ފަޒުލް ދިރިއުޅޭ ގެ ބަލައި ފާސްކޮށް ބައެއް ތަކެތި ގެންގޮސްފި

އެޗްޑީސީގެ ކުރީގެ އެމްޑީ ފަޒުލް ރަޝީދު -- ސަން ފޮޓޯ

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ދިރިއުޅުއްވާ މ. ޒޭވަރު ގެއަށް ފުލުހުން ވަދެ އެގެ ބަލައި ފާސްކޮށް އައެއް ތަކެތި ފުލުހުން ރޭ ގެންގޮސްފި އެވެ.

ފުލުހުން ބުނީ ފަޒުލްގެ ގެ ކޯޓް އަމުރެއްގެ ދަށުން ފާސްކޮށް މިހާރު ކުރިއަށްދާ ތަހުގީގަށް ބޭނުންވާނޭ ބައެއް އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

"ބެލުމުގެ ދަށަށް ގެނައި ތަކެތީގެ ތެރޭގައި އިލެކްޓްރޯނިކް ބައެއް ސާމާނުތައް ހިމެނޭ،" ފުލުހުން ބުންޏެވެ.

ބިންވެރިޔާ ސްކީމުގައި ނުހިމެނޭ ބަޔަކަށް އެޗްޑީސީން ގޯތި ދިން ކަމަށް ތުހުމަތު ކުރެވޭ މައްސަލަ ފެންމަތިވީ މިދިޔަ ބުދަ ދުވަހު އެވެ. އަދި މައްސަލައިގެ ޖިނާއީ ތަހުގީގެއް އޭސީސީއާއި ފުލުހުން އަންނަނީ ހިންގަމުންނެވެ.

ފުލުހުން ބުނެފައި ވަނީ މި މައްސަލައާ ގުޅުވައިގެން ފުލުހުން ތަހުގީގު ކުރައްވަމުން ގެންދަނީ ޑޮކިއުމަންޓް ފޯޖް ކޮށްފައިވާ ކަމަށް ތުހުމަތު ކުރެވޭ މައްސަލަ ކަމަށެވެ.

މި މައްސަލަ ފެންމަތިވުމާއެކު އެޗްޑީސީ ޗެއާމަން އަހްމަދު ނާސިފް (ޑީޑީ) ފިޔަވައި އެ ކުންފުނީގެ ބޯޑުގެ ހުރިހާ ބޭފުޅުން ވަނީ ސަސްޕެންޑްކޮށްފަ އެވެ. އޭގެ ތެރޭގައި އެމްޑީ ފަޒުލް ރަޝީދު ވެސް ހިމެނެ އެވެ. ފަޒުލް މަގާމުން އިސްތިއުފާ ދެއްވީ އެ ތުހުމަތު ތަކަށްފަހު އެވެ.

އެޗްޑީސީ ފުލުހުން