އެމްޑީޕީން ފުލެޓްތައް ބެހީ މޫކައި ހޮޓެލުގައި ތިބެގެން ކަމަށް ނިހާދު ތުހުމަތު ކުރައްވައިފި

ކުރީގެ އެމްޑީޕީ ސަރުކާރުގައި ފްލެޓުތަކާއި ބިންތައް ބަހައިލީ މޫކައި ހޮޓެލްގައި ތިބެގެން ކަމަށް ވިދާޅުވެ، 19 ވަނަ މަޖިލީހުގައި އެމްޑީޕީ ތަމްސީލުކުރެއްވި ކުރީގެ މެންބަރު މުހައްމަދު ނިހާދު ބޮޑު ތުހުމަތެއް ކުރައްވައިފިއެވެ.

ޕީއެންސީން ރޭ ބޭއްވި ހަރުގެ ޖަލްސާގައި ވާހަކަދައްކަވަމުން ނިހާދު ވިދާޅުވީ، އެމްޑީޕީ ސަރުކާރުގައި ފްލެޓުތަކާއި ބިންތައް ބަހައިލީ "އެލީޓް ގްރޫޕު" ގައި ހިމެނޭ މަޖިލިސް މެންބަރުންތަކަކާ އެކު، މޫކައި ހޮޓެލް ތެރޭގައި ކަމަށެވެ. އޭނާ ތުހުމަތުކުރެއްވި ގޮތުގައި، މި ކަމުގައި އިސްކޮށް ހުންނެވީ އޭރުގެ އިކޮނޮމިކް މިނިސްޓަރު ފައްޔާޒު އިސްމާއީލެވެ.

ނިހާދު ވިދާޅުވީ، އެ ސަރުކާރުގައި ހައްގުނުވާ އެތައް ބަޔަކަށް ފްލެޓު ދީފައިވާ ކަމަށެވެ. މީގެ ތެރޭގައި ކުންފުނިތަކުގެ ބޯޑުގައި ތިބި ބޭފުޅުންނާއި، އަމިއްލަ ނަމުގައި ފްލެޓެއް ނުވަތަ ބިމެއް ނުވަތަ އިމާރާތެއް އޮތް ފަރާތްތައް ހިމެނޭ ކަމަށް އޭނާ ތުހުމަތުކުރެއްވިއެވެ.

"ހިޔާގައި ފްލެޓު ހުރި މީހާއަށް ވިނަރެސްއިން ފްލެޓު ލިބިފައި އެބަހުރި. ވިނަރެސްގެ ފްލެޓު ލިބިފައިހުރި މީހާއަށް ހުޅުމާލެއިން ދޫކުރި އަގުބޮޑު ބާރަ ވިހި މިލިއަން ރުފިޔާގެ ބިން ދީފައި އެބަހުރި..." ނިހާދު ވިދާޅުވިއެވެ.

މި ތުހުމަތުތައް ކުރެއްވީ، ކުރީ ސަރުކާރުގެ "ބިންވެރިޔާ ސްކީމް" ގެ ދަށުން ނުހައްގުން ގޯތިތަކެއް ދިން މައްސަލައެއް ބަލަމުންދަނިކޮށެވެ. އަދި ސީލައިފް ގްލޯބަލްގެ ސްކޭމްގައި ގެއްލުންވި މީހުންނަށް ވިނަރެސް ފްލެޓުތަކެއް ދިނުމުގައި ފޭކު ލިޔުންތަކެއް ބޭނުންކޮށްފައިވާކަން ހާމަވެފައިވާ ދަނޑިވަޅެއްގައެވެ.

މި މައްސަލަތައް ފެންމަތިވުމާ ގުޅިގެން، އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވަނީ އިސްތިއުފާ ދެއްވާފައެވެ. ނިހާދުގެ މި ތުހުމަތުތަކާއެކު، ކުރީގެ އެމްޑީޕީ ސަރުކާރުގެ ބޯހިޔާވަހިކަމުގެ މަޝްރޫޢުތަކާ ގުޅޭ އިތުރު ސުވާލުތައް އުފެދިފައިވެއެވެ.