ދިރުވާލައިގެން މަސްތުވާތަކެތި އެތެރެކުރަން އުޅުނު ބިދޭސީއަކާއި އިތުރު 3 މީހަކު ހައްޔަރުކޮށްފި

ދިރުވާލައިގެން ރާއްޖެއަށް ކިލޯއަކަށްވުރެ ގިނަ މަސްތުވާތަކެތި އެތެރެ ކުރަން އުޅުނު ބްރެޒިލްގެ ރައްޔިތެއް ކަމަށްވާ ލެންޑަސަން ޑިޕައުލޯ ގާސިއާ (44) ހައްޔަރުކޮށްފިއެވެ.

އޭނާގެ ހަށިގަނޑުން މަސްތުވާތަކެތި ކަމަށް ޝައްކުކުރެވޭ 107 ރަބަރު ބުލެޓު ފެނިފައިވެއެވެ.

މި މައްސަލައާ ގުޅިގެން މަސްތުވާތަކެއްޗާ ހަވާލުވާން ދިޔަ ކަމުގެ ތުހުމަތުގައި ހުސައިން ފަރުޝާން (39) ވެސް ހައްޔަރުކޮށްފައިވެއެވެ. ކްރިމިނަލް ކޯޓުން މި ދެ މީހުންގެ ބަންދުގެ މުއްދަތަށް ފަސް ދުވަސް ޖަހައިދީފައިވެއެވެ.

މީގެއިތުރުން، ދިރުވާލައިގެން މަސްތުވާތަކެތި އެތެރެކުރި އިތުރު ދެ މައްސަލައެއްގައި ދެ މީހަކު ހައްޔަރުކޮށްފައިވެއެވެ. އެއީ ނ. މަނަދޫ، ޕީކޮކް، އިހްސާން އިސްހާގު (33) އާއި މއ. ސޭބު، މުހައްމަދު ފާރިޝް (40) އެވެ.

އިހްސާން އިސްހާގުގެ ހަށިގަނޑުން 114 ގްރާމް ހުރި އަށް ރަބަރު ބުލެޓް ފެނިފައިވާއިރު، މުހައްމަދު ފާރިޝްގެ ހަށިގަނޑުން 10 ގްރާމް ހުރި އެއް ރަބަރު ބުލެޓް ފެނިފައިވެއެވެ. މި ދެ މީހުންގެ ބަންދުގެ މުއްދަތަށްވެސް ކްރިމިނަލް ކޯޓުން ޖަހައިދީފައިވަނީ ފަސް ދުވަހެވެ.

ކްރިމިނަލް ކޯޓުގެ ބަންދު އަމުރުގައި ފާހަގަކޮށްފައިވަނީ މި މައްސަލަތަކަކީ ރޭވިގެން ގުރޫޕު ހަދައިގެން ހިންގާފައިވާ އަމަލުތަކެއް ކަމަށް ބެލެވޭ ކަމަށެވެ. މި ހަތަރު މީހުންވެސް ވަނީ ޤާނޫނީ ވަކީލެއްގެ އެހީތެރިކަމަށް އެދިފައެވެ.