ތަފާތު ބޮޑު ނަތީޖާއަކުން ޓޮޓެންހަމް ބަލިކޮށް ލިވަޕޫލުން ތާވަލުގައި 4 ޕޮއިންޓުގެ ލީޑެއް ނަގައިފި

ރޭގެމެޗުގައި ލިވަޕޫލުގެ ފޯވާޑުން ވަނީ ތަފާތު ދައްކާފައި

އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕަރ އާ ދެކޮޅަށް ކުޅެ 6-3 ގެ ތަފާތު ބޮޑު ނަތީޖާއަކުން މޮޅުވެ ލިވަޕޫލުން ޕޮއިންޓު ތާވަލުގައި ހަތަރު ޕޮއިންޓުގެ ލީޑެއް ނަގައިފިއެވެ.

ލިވަޕޫލަށް ހަތަރު ޕޮއިންޓުގެ ލީޑެއް ލިބިގެން މި ދިޔައީ ތާވަލުގެ ދެވަނާގައި އޮތް ޗެލްސީން ރޭ ކުޅުނު މެޗުގައި އެވެޓަން އާއި ބައްދަލުކޮށް 0-0 ން އެއްވަރުވުމާއި ގުޅިގެންނެވެ. ރޭގެ މިނަތީޖާ ތަކާއި އެކު ލިވަޕޫލަށް މިހާރު ވަނީ 16 މެޗުން 39 ޕޮއިންޓު ލިބިފައެވެ. ދެވަނައިގައިވާ ޗެލްސީ އަށް 17 މެޗުން ލިބިފައިވަނީ 35 ޕޮއިންޓެވެ.

ރޭގެ މެޗުގައި ލިވަޕޫލްގެ ފަރާތުން ލުއިސް ޑިއާޒް(2 ލަނޑު) ،މުހައްމަދު ސަލާ (2 ލަނޑު) ،އެލެކްސިސް މެކަލިސްޓަރ އަދި ޑޮމިނިކް ސޮބޮސްލާއީ ވަނީ ލަނޑު ޖަހާފައެވެ. ޓޮޓްނަމްގެ ފަރާތުން ޖޭމްސް މެޑިސަން، ކުލުސޭވްސްކީ އަދި ޑޮމިނިކް ސޮލާންކޭ ވަނީ ލަނޑު ޖަހާފައެވެ.

މި މެޗުގައި މުހައްމަދު ސަލާހު ވަނީ ޕްރިމިއާ ލީގުގެ ސީޒަނެއްގައި، އަހަރު ނިމުމުގެ ކުރިން، 10 ލަނޑު ޖަހައި، 10 ލަނޑު ޖަހަން ފުރުސަތު ތަނަވަސްކޮށްދިން ފުރަތަމަ ކުޅުންތެރިޔާގެ ރެކޯޑު ޤާއިމުކޮށްފައެވެ. އޭނާ މިހާރު ވަނީ ލީގުގައި 15 ގޯލު ޖަހައި، 11 ގޯލު ޖަހަން ފުރުސަތު ހޯދައިދީފައެވެ.

މި މެޗުގައި ޓޮޓްނަމްގެ ސަޕޯޓަރުން ވަނީ އެ ކްލަބުގެ ވެރިންނާމެދު ހިތްހަމަނުޖެހުން ފާޅުކޮށްފައެވެ. އެގޮތުން މެޗުގެ 24 ވަނަ މިނިޓުގައި ސަޕޯޓަރުން ވަނީ ކަޅު ކުލައިގެ ފުއްޕާހަންތަކެއް ދޫކޮށްލާފައެވެ. މިއީ މިހާރުގެ ވެރިން އެ ޒިންމާ އަދާކުރަމުންދާތާ 24 އަހަރު ވުމާ ގުޅިގެންނެވެ.

އިނގިރޭސި ޕްރިމިއަރ ލީގު