ފެނަކަ ކޯޕަރޭޝަނުގެ އެމްޑީ މުޢާޒް މުޙައްމަދު ރަޝީދު އިސްތިއުފާ ދެއްވައިފި

ފެނަކަ ކޯޕަރޭޝަނުގެ މެނޭޖިންގ ޑިރެކްޓަރު މުޢާޒް މުޙައްމަދު ރަޝީދު އިސްތިއުފާ ދެއްވައިފިއެވެ.

އިސްތިއުފާދެއްވިކަން މުޢާޒް ވަނީ ސޯޝަލް މީޑިއާގައި ޙިއްސާކުރައްވާފައެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ފޮނުއްވެވި ސިޓީއެއްގައި އިސްތިއުފާ ދެއްވި ސަބަބުތައް ބަޔާންކުރައްވާފައިވެއެވެ.

މުޢާޒް ވިދާޅުވެފައިވަނީ ކުންފުނީގެ މާލީ ހާލަތު ދަށްވުމުގެ ސަބަބުން ކުންފުނި ހިންގުމުގައި ބޮޑެތި ގޮންޖެހުންތަކާ ކުރިމަތިވެފައިވާ ކަމަށެވެ. އޭގެ ތެރޭގައި ކުންފުންޏާ ހަވާލުވިއިރު 4.3 ބިލިޔަން ރުފިޔާގެ ދަރަންޏެއް އޮތުމާއި، އެކަށީގެންވާވަރަށްވުރެ ގިނައިން ވަޒީފާ ހަމަޖައްސަން ޖެހުން ހިމެނެއެވެ. އަދި ކުންފުނި ރައިޓް ސައިޒްކުރުމަށް ކަމާ ގުޅުންހުރި އިދާރާތަކުން އެކަށީގެންވާ އެއްބާރުލުމެއް ނުލިބޭކަންވެސް ފާހަގަކުރައްވާފައިވެއެވެ.

މި ގޮންޖެހުންތަކާއެކުވެސް ފާއިތުވި އެއް އަހަރު ދުވަހު ކުންފުނީގެ ހިންގުން ހަރުދަނާކޮށް ޚަރަދުކުޑަކުރަން ގިނަ މަސައްކަތްތަކެއް ކުރެވުނު ކަމަށް މުޢާޒް ވިދާޅުވެފައިވެއެވެ. އެގޮތުން މިއަހަރުގެ އޮކްޓޯބަރު މަހުގެ ނިޔަލަށް 160 މިލިޔަން ރުފިޔާއަށްވުރެ ބޮޑު އަދަދެއް ހިންގުމުގެ ޚަރަދުން ސަލާމަތްކުރެވިފައިވާ ކަމަށް ފާހަގަކުރައްވާފައިވެއެވެ.

ނަމަވެސް މުޢާޒް ވިދާޅުވެފައިވަނީ ހިންގުމުގެ ޚަރަދު ސަލާމަތްކޮށްގެންވެސް މިހާރު އެ ކުންފުނި ވެއްޓިފައިވާ މާލީ ހާލަތުން ސަލާމަތް ނުކުރެވޭނެ ކަމަށެވެ. އަދި މެނޭޖިންގ ޑިރެކްޓަރުގެ މަޤާމުގައި ހުންނަވައިގެން ކުންފުނީގެ ކަންކަން އިތުރަށް ރަނގަޅު ކުރެވޭނެ އަލިމަގެއް ނުފެންނާތީ އިސްތިއުފާ ދެއްވާ ކަމަށް ރައީސުލްޖުމްހޫރިއްޔާއަށް ފޮނުއްވި ސިޓީގައި ބަޔާންކުރައްވާފައިވެއެވެ.