ހިޔާ ފްލެޓްތަކުގައި އިމިގްރޭޝަނުން ރެއިޑްކޮށް 3 ބިދޭސީއަކު ހިފަހައްޓައިފި

އިމްގްރޭޝަން ކުރިއަށް ގެންދިޔަ ރެއިޑުގެ ތެރެއިން / ފޮޓޯ: އިމިގްރޭޝަން

މޯލްޑިވްސް އިމިގްރޭޝަނުން ހުޅުމާލެ ފޭސް 2 ގެ ހިޔާ ފްލެޓްތަކުގައި ރެއިޑް އޮޕަރޭޝަނެއް ހިންގައި، ގަވާއިދާ ޚިލާފަށް މަސައްކަތްކުރަން އުޅުނު ތިން ބިދޭސީއަކު ހިފަހައްޓައިފިއެވެ.

އިމިގްރޭޝަނުން ބުނިގޮތުގައި މި ރެއިޑް އޮޕަރޭޝަން އަމާޒުކޮށްފައިވަނީ ހިޔާ ފްލެޓްތަކުގައި ހިންގާ ވިޔަފާރިތަކަށެވެ. މި އޮޕަރޭޝަނުގައި އަށް ފިހާރައަކާއި ހަތަރު ކެފޭ/ރެސްޓޯރަންޓު/ބޭކަރީ އަދި ސެލޫނެއް ބަލައި ފާސްކޮށްފައިވެއެވެ.

މި ތަންތަނުގެ ތެރެއިން ދެ ތަނެއްގައި ގަވާއިދާ ޚިލާފަށް މަސައްކަތްކުރަން އުޅުނު ތިން ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައިވާ ކަމަށް އެ އިދާރާއިން ހާމަކޮށްފައިވެއެވެ.

ގަވާއިދާ ޚިލާފަށް ރާއްޖޭގައި އުޅޭ ބިދޭސީން ހުއްޓުވުމަށް އިމިގްރޭޝަނުން ހިންގާ އޮޕަރޭޝަންތަކުގެ ތެރެއިން މިހާތަނަށް 5،000 އަށްވުރެ ގިނަ މީހުން ވަނީ ޑީޕޯޓްކޮށްފައެވެ.

މީގެ އިތުރުން، ސާފުތާހިރުކަން ދަށްކޮށް ކާބޯތަކެތި ހަދައި ވިޔަފާރިކުރާ ތަންތަން ވެސް އިމިގްރޭޝަނުން އަންނަނީ ހުއްޓުވަމުންނެވެ.

މި ރެއިޑް އޮޕަރޭޝަނަކީ ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންނާ ދެކޮޅަށް އިމިގްރޭޝަނުން ހިންގާ ހަރުދަނާ ފިޔަވަޅުތަކުގެ ތެރެއިން އެއް ފިޔަވަޅެވެ.

އިމިގްރޭޝަން