އިންޑިއާގެ އަންހެން ޑޮކްޓަރު މަރާލި މައްސަލަ: ތުހުމަތުކުރެވޭ ފަރާތް ކުށަށް އިންކާރުކޮށްފި

މައްސަލާގައި އިންޑިއާގެ ސަރުކާރުން ދައުވާ އުފުލާފައިވާ ފަރާތް

އިންޑިއާގެ ކޮލްކަތާގައި 31 އަހަރުގެ އަންހެން ޑޮކްޓަރެއް ރޭޕްކޮށް މަރާލި ކަމުގެ ތުހުމަތުގައި ހައްޔަރުކޮށްފައިވާ 33 އަހަރުގެ ސަންޖޯއީ ރޯއި، ކޯޓުގައި ކުށަށް އިންކާރުކޮށްފިއެވެ.

މި މައްސަލައިގައި ދައުވާ ލިބޭ ހަމައެކަނި މީހާއަކީ ވެސް ރޯއިއެވެ.

މިދިޔަ އޮގަސްޓް މަހުގެ 9 ވަނަ ދުވަހު އާރް ޖޭ ކާރު މެޑިކަލް ހޮސްޕިޓަލުން ޑޮކްޓަރުގެ ހަށިގަނޑު ފެނުމާ ގުޅިގެން، އިންޑިއާގެ އެކި ކަންކޮޅުތަކުގައި ވަނީ ނުރުހުން ފާޅުކޮށް މުޒާހަރާކޮށްފައެވެ. ރޯއި ހައްޔަރުކުރީ ޑޮކްޓަރު މަރާލާފައި އޮއްވާ ފެނުނުތާ އެއް ދުވަސް ފަހުންނެވެ.

ކޯޓުގައި ކުރިއަށްދިޔަ އަޑުއެހުމުގައި ރޯއި ބުނެފައިވަނީ އޭނާއަކީ ކުށްވެރިއެއް ނޫން ކަމަށާއި، އޭނާ ވަނީ ފްރޭމްކޮށްފައި ކަމަށެވެ. ކުށް ސާބިތުވެއްޖެނަމަ ރޯއިގެ މައްޗަށް މަރުގެ ހުކުމް އަންނާނެއެވެ.

މި މައްސަލައިގެ ޝަރީއަތުގެ އަޑުއެހުންތައް ފެށީ ނޮވެމްބަރު 11 ވަނަ ދުވަހެވެ. މިހާތަނަށް 50 އަށްވުރެ ގިނަ ހެކިންގެ ހެކިބަސް އަޑުއަހާފައިވެއެވެ. އެންމެ ފަހުން ބޭއްވުނު އަޑުއެހުމުގައި ފަނޑިޔާރު 100 އަށްވުރެ ގިނަ ސުވާލު ކުރެއްވި ކަމަށާއި، އަޑުއެހުން ހަ ގަޑިއިރަށް ދިގުދެމިގެންދިޔަ ކަމަށް ރޯއިގެ ވަކީލު ވިދާޅުވިއެވެ.

މި އަނިޔާވެރި ޢަމަލާ ގުޅިގެން ކޮލްކަތާގެ ޑޮކްޓަރުން ވަނީ އެތައް ދުވަހެއް ވަންދެން ހަޅުތާލުކޮށްފައެވެ. މި މައްސަލައިގެ ދެން އޮންނަ އަޑުއެހުން އޮންނާނީ އަންނަ އަހަރުގެ ޖެނުއަރީ މަހުގެ 2 ވަނަ ދުވަހުއެވެ.

އިންޑިޔާ