ބިއުޓިފުލް ބުލޫ މައިކަޕް: އުލިގަމުގެ މުޅި ފޯކަސް ތިން ޕޮއިންޓަށް

ކްލަބް ޕޯލްސްޓާއިން އިންތިޒާމުކޮށްގެން ބޮޑުތިލަދުންމަތީގައި ބާއްވާ އެންމެ އަގުބޮޑު ފުޓުބޯޅަ މުބާރާތް “މައިކަޕް”ގެ ތިންވަނަ މެޗްގައި މިއަދު ހަވީރު ބައްދަލު ކުރާނީ ބީބީ ބްރަދާސް (ހދ ނޮޅިވަރަމް) އާއި ހއ.އުލިގަމެވެ.

ޒުވާން ޓީމަކާއެކު މުބާރާތަށް ނިކުންނަ އުލިގަމަކީ ފުޓުބޯޅައިގައި މިހާތަނަށް ގިނަ ކާމިޔާބީތަކެއް ހޯދިފައިވާ ޓީމެއް ކަމަށް ނުވި ނަމަވެސް މި މުބާރާތަށް އެ ޓީމުން ކުރާ އުއްމީދު ބޮޑެވެ.

2020 ވަނަ އަހަރު އެންމެ ފަހުން ބޭއްްވި މައިކަޕް ފުޓުބޯޅަ މުބާރާތުގެ ކުއާރޓާ ފައިނަލްގައި އުލިގަމު ދިއްދުއާ ދެކޮޅަށް ކުޅުނެވެ. އެ މެޗް 1-0 ގެ ނަތީޖާ އަކުން ކާމިޔާބު ކުރީ ދިއްދުއެވެ. މިއީ އުލިގަމުން މައިކަޕްގެ މުބާރާތަކަށް ނިކުންނަ ދެވަނަ ފަހަރެވެ.

ހއ ކެލާގައި ދާދިފަހުން ބޭއްވި ތިލައުތުރު ފުޓްސަލް މުބާރާތުގައިވެސް އުލިގަމުން ވާދަ ކުރިއެވެ. ނަމަވެސް އެއްވެސް މެޗެއް ކާމިޔާބު ނުކުރެވި އުލިގަމަށް ޖެހުނީ މުބާރާތުން އަލްވަދާޢު ކިޔާށެވެ.

އެެހެންނަމަވެސް، މައިކަޕްގެ މި ފަހަރުގެ މުބާރާތަށް އުލިގަމުން ވަނީ ދުރާލާ ތައްޔާރުވެފައެވެ. ޓީމުގެ ތައްޔާރީތަކާ ގުޅޭގޮތުން ދެލި އޮންލައިން އަށް މަޢުލޫމާތު ދެމުން އެ ޓީމުގެ މެނޭޖަރ އަސަދުﷲ މުޙައްމަދު ބުނީ ޓީމް އޮތީ މުބާރާތަށް ވަރަށް ބޮޑަށް ތައްޔާރުވެފައި ކަމަށާއި މިއަދުގެ މެޗުން ބޭނުންވަނީ ތިން ޕޮއިންޓް ކަމަށެވެ.

އުލިގަމުގެ ޓީމަށް ބަލާއިރު ރަށުން ބޭރު ދެ ކުޅުންތެރިއަކު ހިމެނެއެވެ. އެއީ ލ.ގަމަށް ނިޞްބަތްވާ ކުޅުންތެރިއެއްގެ އިތުރުން ހދ ހިރިމަރަދުއަށް ނިޞްބަތްވާ ކުޅުންތެރިއެކެވެ.

ޓީމުގެ ތައްޔާރީތަކުގެ ތެރެއިން:

ބޮޑުތިލަދުންމަތީގެ އެންމެ ޝަރަފުވެރި މުބާރާތް، މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ. 2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ.  މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ.

ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިޔަށް ގެންދާނެކަންވަނީ އިއުލާންކޮށްފައެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމާފައެވެ.