ކުރީގެ ސަރުކާރުން ދިން ބަދަލުތަކާ ގުޅޭ ޖިނާއީ ތަޙުޤީޤެއް ފަށަނީ

ކުރީގެ ސަރުކާރުން އެކި ފަރާތްތަކަށް ބަދަލުގެ ގޮތުގައި ފައިސާ ދިނުމުގައި ޢަމަލުކޮށްފައިވާ ގޮތްތަކާ ގުޅޭ ޖިނާއީ ތަޙުޤީޤެއް ހިންގުމަށް ޕްރޮސެކިއުޓަރ ޖެނެރަލް (ޕީޖީ) އެންޓި-ކޮރަޕްޝަން ކޮމިޝަން (އޭސީސީ) އަށް އަންގަވާފިއެވެ.

މި މައްސަލައާ ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީން ތައްޔާރުކޮށްފައިވާ ރިޕޯޓެއް ޕީޖީ އޮފީހަށް ލިބިފައިވާ ކަމަށް އެ އޮފީހުން ބުނެއެވެ. އެ ރިޕޯޓުގައި ދައުލަތުގެ މުދަލާއި ފައިސާ ޙައްޤުނުވާ ފަރާތްތަކަކަށް ދިނުމަށް މަސައްކަތްކުރި ކަމުގެ ތުހުމަތު، ދައުލަތުގެ އިސް މަޤާމުތަކެއް އަދާކޮށްފައިވާ ބައެއްގެ މައްޗަށް ކޮށްފައިވެއެވެ.

އަދި ދައުލަތުގެ ބައެއް މުވައްޒަފުން ރަސްމީ ވާޖިބުތަކާ ޚިލާފަށް އަދި ދައުލަތަށް ގެއްލުންވާ ގޮތަށް ޢަމަލުކޮށްފައިވާ ކަމަށްވެސް އެ ރިޕޯޓުގައި ތުހުމަތުކޮށްފައިވާ ކަމަށް ޕީޖީ އޮފީހުން ހާމަކޮށްފައިވެއެވެ.

މި މައްސަލަތަކަކީ އޭސީސީން ތަޙުޤީޤުކުރުމުގެ ބާރު ލިބިފައިވާ މައްސަލަތަކެއް ކަމަށް ބުނެ، އަވަސް ތަޙުޤީޤެއް ހިންގުމަށާއި ތަޙުޤީޤުގެ ކުރިއެރުންތަކާ ގުޅޭގޮތުން ޕީޖީ އޮފީހާ މަޝްވަރާކުރުމަށް އޭސީސީއަށް އަންގާފައިވާ ކަމަށް ޕީޖީ އޮފީހުން ބުނެއެވެ.

މި މައްސަލައިގައި ޖިނާއީ ތަޙުޤީޤެއް ހިންގަން އަންގާފައިވާއިރު، ބަދަލުގެ ގޮތުގައި ފައިސާ ދިނުމަށް ކުރީގެ ސަރުކާރުން ހަދާފައިވާ އެއްބަސްވުންތައް ބާޠިލުކޮށް، އެ ފައިސާ އަނބުރާ ހޯދުމަށް އެޓަރނީ ޖެނެރަލްގެ އޮފީހުން ވަނީ ނިންމާފައެވެ.