އަލީ ރަމީޒު ޖަމިއްޔަތުއް ސަލަފުން އިސްތިއުފާ ދީފި

ދިވެހިން އިސްލާމް ދީނަށް ހޭލުންތެރިކުރުވުމުގެ މަސައްކަތުގައި އިސްކޮށް އުޅުއްވާ އަލީ ރަމީޒު، ޖަމިއްޔަތުއް ސަލަފުން އިސްތިއުފާ ދީފި އެވެ.

އަލީ ރަމީޒް މިކަން އިއުލާންކުރައްވާފައި ވަނީ އޭނާގެ ރަސްމީ ފޭސްބުކް އެކައުންޓް މެދުވެރިކުރައްވައެވެ. ސަލަފް އުފެއްދެވުމުގައި ވެސް އިސްކޮށް މަސައްކަތް ކުރެއްވި އަލީ ރަމީޒު އިސްތިއުފާ ދެއްވި ސަބަބު އަދި ހާމަކުރައްވާފައެއް ނުވެއެވެ. "ޖަމިއްޔަތުއް ސަލަފުން އަޅުގަނޑު އިސްތިއުފާ ދީފިން" ފެސްބުކު ޕޭޖުގައި ޢަލީ ރަމީޒު ލިޔުއްވާފައިވެއެވެ.

އަލީ ރަމީޒު ގިނަ ބަޔަކަށް ފުރަތަމަ ފާހަގަކުރެވުނީ މިއުޒިކްގެ ދާއިރާއިންނެވެ. އޭނާގެ ޒުވާން ދުވަސްވަރު، ދިވެހިންގެ ތެރެޔަށް ހިތްގައިމު ރީތި ގިނަ ލަވަތަކެއް ދޫކޮށްލައިފައިވެއެވެ. ނަމަވެސް، 2003 ވަނަ އަހަރު އޭނާ ވަނީ ލަވަކިޔުން ހުއްޓާލައިފައެވެ.

އަލީ ރަމީޒު ވިދާޅުވެފައިވަނީ ލަވަކިޔުން ހުއްޓާލީ މިއުޒިކް ކުޅުމާއި ލަވަކިޔުމަކީ ހަރާމްކަމެއްކަން އިތުބާރު ހުރި އިލްމުވެރިންގެ ބަސްފުޅުތަކުން ޝައްކެއް ނެތް މިންވަރަށް އެނގި ސާބިތުވުމުންނެވެ. އަދި އޭނާގެ މިއުޒިކީ ހަޔާތުގެ ލަވަތަކާއި ފޮޓޯތައް ފެތުރުމަކީ މިހާރު އޭނާއަށް ދެވޭ އަނިޔާއެއް ކަމަށް ވެސް ވިދާޅުވެފައިވެއެވެ.

މިހާރު އަލީ ރަމީޒު މަސައްކަތް ކުރައްވަނީ ރާއްޖޭގެ ރައްޔިތުންގެ ދީނީ ހޭލުންތެރިކަން އިތުރުކުރުމުގައެވެ. އެގޮތުން ދީނީ ޕްރޮގްރާމްތައް ހުށަހަޅައި، ރައްޔިތުންގެ ދީނީ ހޭލުންތެރިކަން އިތުރުކުރުމަށް ހިންގޭ އެކި ޕްރޮގްރާމްތަކުގައި އިސްކޮށް ހަރަކާތްތެރިވެ ވަޑައިގަންނަވައެވެ. އަދި ލަވަކިޔުން ހުއްޓާލުމަށްފަހު، ގިނަ އަދަދެއްގެ މަދަޙަ ކިޔާ މަދަހަ ސީޑީތަކެއް ވެސް ނެރުއްވާފައިވެއެވެ.

މިއަދުވެސް އަލީ ރަމީޒަކީ ދިވެހިރައްޔިތުންގެ މެދުގައި އެންމެ މަޤުބޫލް އެއް ސަޙްސިއްޔަތެވެ.