ސުޕްރިންޓެންޑެންޓް އޮފް ޕޮލިސް ރަޖުނީ، މަސައްކަތުން އެކަހެރި ކޮށްފި

ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބް (ކ) އަދި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް (ވ) —

ހެޑް އޮފް އިކޮނޮމިކް ކްރައިމް އިންވެސްޓިގޭޝަންސް ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބް، މަސައްކަތުން އެކަހެރި ކޮށްފި އެވެ.

ރަޖުނީ އަކީ "ބިންވެރިޔާ ސްކީމް"ގެ ބޭރުން ހައްގުނުވާ ބަޔަކަށް ގޯތިތަކެއް ދިން ކަމަށް ތުހުމަތުވާ މައްސަލަ ތަހުގީގު ކުރާ ޓީމުގައި އިސްކޮށް ހިމެނޭ އޮފިސަރެކެވެ.

ވިނަރެސް ފްލެޓް ލިބުނު މީހުންގެ ދާއިމީ ލިސްޓުގައި ރަޖުނީ އާއި އޭނާގެ އަންހެނުންގެ ނަން ނެތީސް، އެ ދެމީހުންނަށް ނުހައްގުން ފްލެޓް ދީފައިވާ ކަމަށް ބުނާ ޑޭޓާ ތަކެއް ވަނީ ސޯޝަލް މީޑިއާގައި އިއްޔެއިން ފަށައިގެން ދައުރުވާން ފަށާފަ އެވެ.

ރަޖުނީ މަސައްކަތުން އެކަހެރިކޮށް، ވަގުތީ ގޮތުން އެ މަގާމު އެހެން ފަރާތަކާ ހަވާލު މި ކުރީ އޭނާއަށް ކުރެވޭ ތުހުމަތުތައް ބަލަމުން އަންނަ ކަމަށް ފުލުހުން މިއަދު ބުނެފައި ވަނިކޮށެވެ.

ފުލުހުންގެ ތަރުޖަމާން އަހުމަދު ޝިފާން އެކްސްގައި މިރޭ ވިދާޅުވީ ރަޖުނީ ކުރައްވަމުން ގެންދެވި މަސައްކަތްތައް ވަގުތީ ގޮތުން މިހާރު އެހެން ފަރާތަކާ ހަވާލު ކުރައްވާފައިވާ ކަމަށެވެ.

ޝިފާން ވިދާޅުވީ އެ ބަދަލު ގެންނެވީ އިކޮނޮމިކް ކްރައިމް އިންވެސްޓިގޭޝަންގައި މިހާރު ކުރަމުން އަންނަ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމަށާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެ ކަން ޔަގީން ކުރުމަށް ކަމަށެވެ.

ފުލުހުން