މާލޭގައި ފެންބޮޑުވުމުން 8 ގެއަކުން 32 މީހުން ބަދަލުކޮށްފި

މާލޭގައި ވާރޭވެހި ފެންބޮޑުވުމުގެ ސަބަބުން 8 ގެއަކުން 32 މީހުން ވަގުތީ ހިޔާވަހިކަމަށް ބަދަލުކޮށްފައިވާ ކަމަށް ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

އެންޑީއެމްއޭގެ އެމަޖެންސީ މެނޭޖްމެންޓް ޑިރެކްޓަރ ފަރޫޝާ ޢަލީ ނަޞީރު ވިދާޅުވީ މިހާރު ކުރަމުންދާ ވިއްސާރާގައި މާލޭގެ މަގުތަކުގައި ވަރަށް ބޮޑަށް ފެން ބޮޑުވުމުގެ ސަބަބުން ގިނަ އަދަދެއްގެ ގޭބިސީތަކުން ވެލިބަސްތާ ޖަހައިދިނުމަށް އެދިފައިވާ ކަމަށެވެ. މިގޮތުން 47 ގޭބިސީއެއްގައި 229 ވެލިބަސްތާ ޖެހުމުގެ މަސައްކަތް މިހާރު ކުރަމުންދާ ކަމަށް އޭނާ ވިދާޅުވިއެވެ.

ފަރޫޝާ އިތުރަށް ވިދާޅުވީ މިހާރު ކުރަމުންދާ ވިއްސާރައިގެ ސަބަބުން އެކި ކަންކަމުގައި އެހީތެރިކަމަށް އެދި 101 ފޯނު ކޯލެއް ލިބިފައިވާ ކަމަށެވެ. އަދި އެ އިދާރާއިން ހެދި އެސެސްމެންޓުން ދިރިއުޅުމަށް ދަތިވެފައިވާ 12 ގޭބިސީއެއް ފާހަގަކުރެވިފައިވާ ކަމަށާއި ދިރިނޫޅެވޭވަރަށް ގެއްލުން ލިބިފައިވާ 8 ގޭބިސީއެއް ފާހަގަވި ކަމަށް ވިދާޅުވިއެވެ.

އެންޑީއެމްއޭއިން ވިދާޅުވީ އަތޮޅުތެރޭގެ ރަށްރަށަށް ގެއްލުން ލިބިފައިވާ މިންވަރު ބެލުމަށް ރަށްރަށުގެ ކައުންސިލްތަކަށް ގުޅުމުގެ މަސައްކަތްކުރަމުން އަންނަ ކަމަށާއި، މީހުން ބަދަލުކުރަންޖެހޭ ވަރުގެ ގެއްލުމެއް ލިބިގެން އެއްވެސް ރަށަކުން އަދި މިހާތަނަށް ރިޕޯޓުކޮށްފައިނުވާ ކަމަށެވެ.

މޫސުން ގޯސްވެ، ބޯކޮށް ވާރޭވެހި މާލޭގެ ބައެއް ސަރަހައްދުތަކުގައި ފެން ބޮޑުވެފައިވާއިރު، މިދިޔަ 24 ގަޑިއިރު އެންމެ ގިނައިން ވާރޭ ވެހިފައިވަނީ މާލެއަށްކަމަށް މޫސުމާބެހޭ ޤައުމީ އިދާރާއިން ވަނީ ހާމަކޮށްފައެވެ. މި ހާލަތުގައި ރައްޔިތުންނަށް އެހީތެރިވުމަށް ސަރުކާރުގެ އެ އެކި އިދާރާތަކުން މަސައްކަތްތަކެއް ކުރަމުންދާ ކަމަށް ބެލެވެއެވެ.