ބިއުޓިފުލް ބުލޫ މައިކަޕް: އެންވީކޭ އަމާޒު ސީދާ ތައްޓަށް

ކްލަބް ޕޯލްސްޓާއިން އިންތިޒާމުކޮށް ބޮޑުތިލަދުންމަތީގައި ބާއްވާ އެންމެ އަގުބޮޑު ފުޓުބޯޅަ މުބާރާތް “މައިކަޕް” މިއަދު ފެށުމަށް ހަމަޖެހިފައިވާއިރު އެންވީކޭއިން އެޓީމުގެ ފުރަތަަމަ މެޗްގައި މިރޭ ނިކުންނަނީ ކުޅިމަގާ ދެކޮޅަށެވެ.

މިރޭގެ މެޗަށް އެންވީކޭއިން ވަރަށް ބޮޑަށް ތައްޔާޔުވެފައިވާއިރު، މި ޓީމުގައި ގާނާ އަށް ނިޞްބަތްވާ ކުޅުންތެރިއަކު ހިމެނެއެވެ. މި ކުޅުންތެރިއަކީ ދާދި ފަހުން ކުޅުދުއްފުށީގައި ބޭއްވި މުބާރާތުގައިވެސް ކުޅެ އޭނާ ކުޅުނު ޓީމަށް ޗެމްޕިއަންކަން ހޯދައިދީފައިވާ މޮޅު ކުޅުންތެރިއެވެ.

މީގެ އިތުރުން، ޤައުމީ ފުޓުބޯޅަ ޓީމުގައި ހިމެނޭ އައިހަމް އާއި ސަމޫހު ޢަލީ (ސަމުއްޓޭ) ވެސް މިފަހަރުގެ މުބާރާތުގައި އެންވީކޭއަށް ކުޅެއެވެ. މިއަހަރު އެންވީއޭއިން ހޯދި ކާމިޔާބީގައި މުބާރާތުގެ ތަށި އުފުލާލުމުގައި ސަމޫހު ވަނީ އިސް ދައުރެއް އެ ޓީމުގައި އަދާކޮށްފައެވެ. ހަމައެހެންމެ އެންވީކޭއަކީ އިހަވަންދޫގައި މިހާތަނަށް އުފެދުނު ހުނަރުވެރި ގިނަ ކުޅުންތެރިން ތަކެއް ހިމެނޭ ޒުވާން ޓީމެކެވެ. އެގޮތުން، ހާމިދު (ހާންދޭ)، ފަޒީލް، ސާޖިދުގެ އިތުރުން ޒުއްކޮ ފާހަގަ ކޮށްލެވެއެވެ.

ޤައިޝް އަދި ނާއިޝް އަކީވެސް އިހަވަންދޫއަށް އުފަން ވަރަށް ޒުވާން ދެ ކުޅުންތެރިންނެވެ.

ޓީމުގެ ތައްޔާރީތަކާ ގުޅޭގޮތުން ދެލި އޮންލައިން އަށް މަޢުލޫމާތު ދެމުން، އެންވީކޭގެ މެނޭޖަރ ޢަލީ ރަޝީދު (އަލިއްކޮ) ބުނީ މިރޭގެ މެޗަށް ޓީމު އޮތީ ވަރަށް ބޮޑަށް ތައްޔާރުވެފައި ކަމަށާއި، ޓީމުގެ އަމާޒު ހުރީ ސީދާ ތައްޓަށް ކަމަށެވެ.

“މިރޭ އެންމެ ބޮޑު އިސްކަމެއް ދޭނީ ތިން ޕޮއިންޓް ހޯދަން. ޓީމުގެ ހުރިހާ ކުޅުންތެރިންވެސް ތިބީ މެޗަށް ވަރަށް ފުރިހަމަ އަށް ތައްޔާރުވެ” އަލިއްކޮ ބުންޏެވެ.

އެންވީކޭގެ ކޯޗަކީ ހަމްޒާ އިބްރާހިމެވެ. ހަމްޒާ އަކީ މައިކަޕްގެ އެންމެ ކާމިޔާބު ކޯޗެވެ. އެގޮތުން ހަމްޒާ ވަނީ މައިކަޕްގައި 4 ތަށި އެކިއެކި ޓީމުތަކަށް އެކި އަހަރު ހޯދައިދީފައެވެ. އަދި މި އަހަރު އިހަވަންދޫގައި ބޭއްވި ބޮޑު ދެ މުބާރާތުގައި އެންވީކޭއަށް ތަށި ނަގައިދީފައިވަނީ ކޯޗު ހަމްޒާއެވެ.

މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ.  2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ.  މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ.

ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިޔަށް ގެންދާނެކަންވަނީ އިއުލާންކޮށްފައެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމައިފައެވެ.