އެއާޕޯޓު ބާރުވުމާއެކު ފަސިންޖަރުން 3 ގަޑިއިރު ކުރިން އައުމަށް އިލްތިމާސް ކޮށްފި

މިދުވަސްވަރަކީ އެއާޕޯޓަށް އެންމެ ބާރު ބޮޑު އެއްދުވަސްކޮޅު

އެއާޕޯޓު ބާރުބޮޑުވުމުގެ ސަބަބުން ފަސިންޖަރުން ފުރުމުގެ ތިން ގަޑިއިރު ކުރިން އެއާޕޯޓަށް ދިޔުމަށް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެދިއްޖެއެވެ.

އެމްއޭސީއެލުން އެކްސްގައި ކުރި ޕޯސްޓެއްގައި ބުނެފައިވަނީ އުމްރާއަށް ދާ މީހުން ފުރާ ހަދާތީ، އެއާޕޯޓުގެ މަގުތަކާއި ޓާމިނަލްގައި ޓްރެފިކް ބާރު ބޮޑުވާނެ ކަމަށެވެ.

މި ސަބަބަށްޓަކައި، ފުރުމުގެ ތިން ގަޑިއިރު ކުރިން ފަސިންޖަރުން އެއާޕޯޓަށް އައުމަށް އެމްއޭސީއެލްއިން ވަނީ އިލްތިމާސްކޮށްފައެވެ. އަދި އެއާޕޯޓަށް އައުމަށްފަހު، އެއާޕޯޓު މުވައްޒަފުންގެ އިރުޝާދުތަކާ އެއްގޮތަށް އަމަލުކުރުމަށްވެސް ވަނީ އެދިފައެވެ.

މި ދުވަސްވަރު އެއާޕޯޓު ބާރުވާން ދިމާވާ އެއް ސަބަބަކީ މިއަހަރުގެ ދެވަނަ ޓާމުގެ މިޑް ޓާމް ބްރޭކަށް ގޮސް ސުކޫލުތައް ބަންދުވެފައިވުމެވެ. މީގެ ސަބަބުން ދަތުރުކުރާ މީހުންގެ އަދަދު އިތުރުވާނެކަމަށް ބެލެވެއެވެ.

ހަމައެއާއެކު، މިހާރު ފަތުރުވެރިކަމުގެ ސީޒަންތެރޭގައި ވުމާއެކު، ރާއްޖެއިން ބޭރުން ޒިޔާރަތްކުރާ ފަތުރުވެރިންގެ އަދަދުވެސް އިތުރުވާނެކަމަށް ލަފާކުރެވެއެވެ. މިކަމުގެ ސަބަބުން ރާއްޖޭގެ އެތެރޭގެ ދަތުރުތަކުގެ އިތުރުން ރާއްޖެއިން ބޭރުގެ ދަތުރުތައް ކުރާ މީހުންގެ އަދަދުވެސް ވަނީ އިތުރުވެފައެވެ.

އެމްއޭސީއެލްއިން މި އިލްތިމާސް ކޮށްފައިވަނީ މި ހުރިހާ ކަމަކަށް ރިޢާޔަތްކޮށް، އެއާޕޯޓުގެ ޚިދުމަތްތައް އެންމެ އެކަށީގެންވާ ގޮތުގައި ފޯރުކޮށްދިނުމަށާއި، ފަސިންޖަރުންނަށް ދިމާވެދާނެ ދަތިތައް ކުޑަކުރުމުގެ މަޤްޞަދުގައެވެ.

އެމްއޭސީއެލް