ރައީސް މުއިއްޒުގެ ޒައާމަތުގައި ކަރަންޓު ހިދުމަތުގެ ކުރިމަގު އޮތީ ވަރަށް އުޖާލާކޮށް: ފަހުމީ

ރައީސް ޑރ. މުޙައްމަދު މުއިއްޒުގެ ވެރިކަމުގައި ކަރަންޓު ހިދުމަތުގެ ކުރިމަގު އޮތީ ވަރަށް ވެސް އުޖާލާކޮށް ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.

މިއަދު ފާހަގަ ކުރާ ސްޓެލްކޯގެ 75 ވަނަ އަހަރީ ދުވަހާ ގުޅުވައިގެން އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ ކަރަންޓުގެ ހިދުމަތުގެ އަލިމަސްޔޫބީލާއި ހަމަޔަށް މިއަދު ވާސިލް ވެފައިވާއިރު، ލިބޭ އެންމެ ބޮޑު ހިތްހަމަޖެހުމަކީ ގައުމު ބިނާ ކުރުމާއި، ތަރައްގީ އާއި ތަހުޒީބަށް މަގުފަހިކޮށްދީ، އިންސާނީ އަދި އުމްރާނީ ތަރައްގީ އަށް ކަރަންޓުގެ ހިދުމަތްތެރީން އިހުލާސްތެރިކަމާ އެކު ކޮށްދީފައިވާ އަދި ކޮށްދެމުންގެންދާ އަގުހުރި މަަސައްކަތްތަކެއް ކަމަށެވެ.

މި ކާމިޔާބީގެ ވާހަކަތައް ތާރީހުގައި ލިޔެވިގެންދާއިރު، މި ސިނާއަތުގައި މަސައްކަތް ކުރަމުން އަންނަ މުވައްޒަފުންނާ މެދު ކުންފުނިން ފަހުރުވެރިވާ ކަމަށް ފަހުމީ ވިދާޅުވި އެވެ.

"ޝައްކެއްނެތް ގޮތުގައި، އެކިއެކި ގޮންޖެހުންތަކާ ކުރިމަތިލައްވައިގެން، ކާމިޔާބީގެ ހަރުފަތްތައް ގިރާކުރައްވަމުން އަލިމަސް ޔޫބީލްއާ ހަމައަށް ވާސިލުވުމުގައި، މި ސިނާއަތުގައި އެކި ދުވަސްވަރު މަސައްކަތްކޮށްދެއްވާފައިވާ ބޭފުޅުން ގައުމާއި ރައްޔިތުންގެ ކުރިއެރުމަށް ކޮށްދެއްވި ހިދުމަތްތަކަށާއި، އަދި މިހާރު ތިއްބެވި ބޭފުޅުން މެދުކެނޑުމެއް، ފޫހިކަމެއް އަދި ވަރުބަލިކަމެއްނެތި ކޮށްދެއްވަމުންގެންދަވާ އަގުހުރި ހިދުމަތްތަކަށް އިހުލާސްތެރިކަމާ އެކު ޝުކުރު ދަންނަވަން." ފަހުމީ ވިދާޅުވި އެވެ.

"ރައީސުލް ޖުމްހޫރިއްޔާ ޑރ. މުޙައްމަދު މުއިއްޒުގެ ވެރިކަމުގައި މި ސިނާއަތުގެ ކުރިމަގު އޮތީ ވަރަށްވެސް އުޖާލާކޮށް."

ފަހުމީގެ އެމްޑީ ކަމުގައި ސްޓެލްކޯ އަކީ ރައްޔިތުން އެދޭ ފަދަ ހިދުމަތްދޭ ކުންފުންޏަކަށް ހެދުމަށްޓަކައި ކުންފުނީގެ މުވައްޒަފުންނާ އެކު ގިނަ މަސައްކަތް ތަކެއް ކުރަމުން އަންނަކަން ފާހަގަކޮށްލެވެ އެވެ.

ރާއްޖޭގައި ކަރަންޓުގެ ހިދުމަތް ދޭން ފެށުނީ، 1949 ވަނަ އަހަރުގެ ޑިސެމްބަރު މަހުގެ 20 ވަނަ ދުވަހުގަ އެވެ.

އެކި ނަންނަމުގައި މާލޭގެ ކަރަންޓުގެ ހިދުމަތްދެވި ތަރައްގީ ކުރެވެމުން އައިސް، މިހާރުގެ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އުފެއްދީ 1997 ވަނަ އަހަރުގަ އެވެ.