ބިލިއަނެއްހާ ރުފިޔާގެ ބަދަލު ދިނުން ސަރުކާރުން ހުއްޓުވައިފި

އެމްޑީޕީގެ ސަރުކާރުން ބަދަލުގެ ގޮތުގައި އެކި ފަރާތްތަކަށް ދޭން ނިންމާފައިވާ ބިލިއަނަކަށްވުރެ ގިނަ ރުފިޔާ ސަރުކާރުން ހުއްޓުވައިފިއެވެ.

ބަންޑާރަ ނައިބުގެ އޮފީހުން ނެރުއްވި ބަޔާނެއްގައި ވިދާޅުވެފައިވަނީ، ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމަށް ނިމިދިޔަ ސަރުކާރުން 28 ނޮވެންބަރު 2022 ގައި ސޮއިކޮށްފައިވާ 9 ސެޓްލްމަންޓް އެއްބަސްވުމަކީ ބާޠިލް އެއްބަސްވުންތަކެއް ކަމަށެވެ.

މި މައްސަލައާ ގުޅިގެން، "މައްސަލަ ޙައްލުކުރުމަށް ލަފާދޭ ކޮމިޓީ" ރައީސުލްޖުމްހޫރިއްޔާ އުވާލައްވައި، ސެޓްލްމަންޓް އެއްބަސްވުމުގައި ސޮއިކޮށްފައިވާ މައްސަލަތައް ދިރާސާކުރުމަށް އޭޖީ އޮފީހަށް ފޮނުއްވާފައިވާކަމަށް ބަޔާނުގައި ބަޔާންކޮށްފައިވެއެވެ.

ސެޓްލްމަންޓް ކޮމެޓީ އުވައިލެއްވިއިރު، އެ ކޮމިޓީއިން ވަނީ އެކި ފަރާތްތަކަށް ބަދަލުގެ ގޮތުގައި 225 މިލިއަނަށް ވުރެ ގިނަ ރުފިޔާ ދިނުމަށް ނިންމާފައެވެ. މީގެ އިތުރުން، ފައިސާގެ އިތުރުން ދޭން ކަނޑައެޅި ހަރުމުދަލާއި ރަށްރަށާއި ފަޅުފަޅު ފަދަ ތަންތަނުގެ އަގު 1 ބިލިއަން ރުފިޔާއަށް އަރާކަމަށް އަންދާޒާކުރެވެއެވެ.

ބަދަލުގެ ގޮތުގައި ދޭން ނިންމާފައިވާ ތަންތަނުގެ ތެރޭގައި ވ. ފޮއްތެޔޮބޮޑުފުށި، ނ. އެކުޅިވަރު، ތ. ވަންބަދި، ކަނި އަދި ފުށި، އއ. މާފަރުފަޅު، އއ. މަޑޫގަލި، ރ. ވިލިނގިލި، ރ. ތާވަތާ، ރ. އޮރިމަސްފަރު، ހދ. ހޮނޑާފުށި އަދި ހދ. ކުޑަމުރައިދޫ ހިމެނެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީން މި މައްސަލަ ދިރާސާކުރެއްވުމަށްފަހު، މި އެއްބަސްވުންތަކަކީ އުފެދުމުގައިވެސް ބާޠިލް އެއްބަސްވުންތަކެއް ކަމަށް ނިންމަވައި، އެ އެއްބަސްވުންތައް ބާޠިލްކުރުމަށާއި، އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ، އެ ބަދަލެއް އަނބުރާ ހޯދުމަށް އަންގަވާފައިވެއެވެ.

އޭޖީ އޮފީހުން ވިދާޅުވެފައިވަނީ، މި އުސޫލަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ޤާނޫނާ ޚިލާފަށް އެކުލަވާލާފައިވާ އުސޫލެއްކަމާއި، އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ، ދައުލަތުގެ އޮޑިޓަރ ޖެނެރަލްގެ ބަހެއް ނެތި، ތަޢައްޞުފީ ގޮތެއްގައި، ވަކިފަރާތްތަކަކަށް ނުޙައްޤު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއް ކަމަށެވެ.

 އެހެންކަމުން، އެ އުސޫލުގެ ދަށުން، ނިމިދިޔަ ރިޔާސީ ދައުރުގެ ތެރޭގައި ސޮއިކޮށްފައިވާ 9 ސެޓްލްމަންޓް އެއްބަސްވުމަކީ ޤާނޫނީ ގޮތުން ބަނދެވޭ އެއްބަސްވުންތަކެއް ނޫންކަމާއި، އެއީ ބާޠިލް އެއްބަސްވުންތަކެއް ކަމަށް ބަންޑާރަ ނައިބު ވަނީ ކަނޑައަޅުއްވާފައެވެ.

މި ނިންމުމާ ގުޅިގެން، އެ އެއްބަސްވުންތަކަކީ ޢަމަލުކުރަންނުޖެހޭ އެއްބަސްވުންތަކެއް ކަން ކަމާބެހޭ ދައުލަތުގެ އިދާރާތަކަށް ބަންޑާރަ ނައިބު ވަނީ މިއަދު އަންގަވާފައެވެ. މިއީ ދައުލަތުގެ ބަޖެޓަށް ބޮޑު ލުޔެއް ލިބިގެންދާނެ ނިންމުމެއް ކަމަށް ބެލެވެއެވެ.

މި މައްސަލައިގައި ހިމެނޭ ފަރާތްތަކުގެ މައްޗަށް އަޅަންޖެހޭ ފިޔަވަޅުތައް އެޅުމަށް ބަންޑާރަނައިބަށާއި ކަމާ ގުޅުންހުރި އިދާރާތަކަށް އަންގަވާފައިވާކަމަށްވެސް އޭޖީގެ ބަޔާނުގައި ބަޔާންކޮށްފައިވެއެވެ. މި ނިންމުމަކީ ދައުލަތުގެ މާލިއްޔަތު ރައްކާތެރިކުރުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.