ބިންވެރިޔާއާއި ގެދޮރުވެރިޔާ ސްކީމާ ގުޅޭ އަވަސް ތަޙުޤީޤެއް ފަށައިފި

ކުރީގެ ސަރުކާރުން ގޯތި ދޫކުރުމަށް ހިންގި "ބިންވެރިޔާ" ސްކީމާއި ފްލެޓް ދޫކުރުމަށް ހިންގި "ގެދޮރުވެރިޔާ" ސްކީމާ ގުޅޭ އަވަސް ތަޙުޤީޤެއް ފަށައިފިކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ހާމަކޮށްފިއެވެ.

މި ތަޙުޤީޤު ފެށުމަށް ނިންމާފައިވަނީ، ބިންވެރިޔާ ސްކީމްގެ ދަށުން ގޯތި ނުލިބޭ ދެ މީހަކު ގޯތި ލިބުނު ކަމަށް ބުނެ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ހުށަހެޅި ޞައްޙަ ނޫން ލިޔެކިޔުންތަކެއް އާންމުވެ، އެޗްޑީސީގެ އެމްޑީއަށް ތުހުމަތު ކުރެވޭ ކަންތައްތަކެއް ފެންމަތިވުމާ ގުޅިގެންނެވެ.

މި މައްސަލައާ ގުޅޭގޮތުން، ޕްރޮސިކިއުޓަރ ޖެނެރަލް (ޕީޖީ) އައްބާސް ޝަރީފް ވަނީ ފުލުހުންނާއި އޭސީސީއަށް ތަޙުޤީޤު ހިންގުމަށް އަމުރުކުރައްވާފައެވެ. މި އަމުރުގައި، ފޯމު ބަލައިގަތުމާއި ފްލެޓާއި ގޯތި ލިބޭ ފަރާތްތައް ކަނޑައެޅުމާއި ގޯއްޗާއި ފްލެޓް ދޫކުރުމުގައި ޢަމަލުކޮށްފައިވާ ގޮތުގެ ތަޙުޤީޤެއް ހިންގުމަށް އަންގާފައިވެއެވެ.

އަދި މި މައްސަލައިގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނަމަ، އެކަން ތަޙުޤީޤުކުރުމަށްފަހު ދަޢުވާ ކުރުމަށް ޕީޖީ އޮފީހަށް ހުށަހެޅުމަށްވެސް އަންގާފައިވެއެވެ. މީގެ އިތުރުން، ތަޙުޤީޤު ހިނގަމުންދާ ގޮތް ކޮންމެ ހަފުތާއަކު އެއްފަހަރު ޕީޖީއަށް ހިއްސާކުރަމުން ގެންދިއުމަށާއި އަވަސް ތަޙުޤީޤެއް ހިންގުމަށްވެސް އަމުރުކުރައްވާފައިވެއެވެ.

މި އަމުރާ ގުޅިގެން އޭސީސީން މިރޭ އެކްސްގައި ކުރި ޕޯސްޓެއްގައި ބުނެފައިވަނީ، ކޮމިޝަނުން މިހާރު ދަނީ ދިވެހި ފުލުހުންގެ ޚިދުމަތާއެކު މަޝްވަރާކޮށް، އަވަސް ތަޙުޤީޤެއް ކުރަމުންކަމަށެވެ. އަދި މި ތަޙުޤީޤާ ގުޅިގެން މިއަދު ފުލުހުންނާއި އޭސީސީގެ އިސް ބޭފުޅުން ވަނީ ބައްދަލުވުމެއް ބާއްވާފައެވެ.