ރައީސަށް އެނގިގެން ރައްޔިތުންގެ ހައްގަކަށް އުނިކަމެއް ލިބޭނެ ކަމެއް ހިނގިޔަނުދޭނެ: އާދަމް ޝަރީފް

ރައްޔިތުންގެ ހައްގަކަށް އުނިކަމެއް ލިބޭނެ އެއްވެސް ކަމެއް ރައީސް ޑރ. މުޙައްމަދު މުއިއްޒަށް އެނގިވަޑައިިގެން ހިނގިޔަނުދެއްވާނެ ކަމަށް ލޯކަލްގަވަރުމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވެފައި މިވަނީ "ބިންވެރިޔާ" ސްކީމުގެ ބޭރުން ގޯތި ދިން ކަމަށް ބުނާ މައްސަލައެއް ފެންމަތިވެ، އެޗްޑީސީގެ ޗެއާމަން އަހުމަދު ނާސިފު ފިޔަވައި އެ ކުންފުނީގެ ހުރިހާ ބޯޑު މެންބަރުން ސަސްޕެންޑް ކޮށްފައިވަނިކޮށެވެ.

އާދަމް ޝަރީފް ޓްވިޓާގައި ކުރެއްވި ޕޯސްޓެއްގައި ވިދާޅުވީ ކޮރަޕްޝަނަށް އެއްވެސް ފުރުސަތެއް މި ސަރުކާރުން ނުދޭނެ ކަން ރައީސްގެ ނިންމެވުންތަކުން ވަރަށް ރަނގަޅަށް ސާފުވާ ކަމަށެވެ.

އެމަނިކުފާނު ވިދާޅުވީ ރާއްޖެއިން ކޮރަޕްޝަން މަދު ކުރެވޭނީ އެފަދަ ކަމަކަށް މަގުފަހިވެދާނެ ކޮންމެ ކަމަކަށް މުއައްސަސާ ތަކުންނާއި އާންމު ރައްޔިތުން ވެސް ނޫނެކޭ ބުނެގެން ކަމަށާއި އެ ހިތްވަރު އެންމެންގެ ހުންނަންވާނެ ކަމަށެވެ.

"ރައްޔިތުންގެ ހައްގަކަށް އުނިކަމެއް ލިބޭނެ އެއްވެސް ކަމެއް ރައީސް މުއިއްޒަށް އެނގިވަޑައިިގެން ހިނގިޔަނުދެއްވާނެ. އެ ޔަގީން އެބައޮތް،" މިނިސްޓަރުގެ ޓްވީޓުގައިވެ އެވެ.

ސަރުކާރުގެ ތަރުޖަމާން ހީނާ ވަލީދު ވިދާޅުވެފައިވަނީ އެޗްޑީސީ ބޯޑު މެންބަރުންގެ މަސައްކަތުން އެކަހެރި ކުރީ ފުލުހުން އެ ކުންފުނީގައި ކުރިއަށްގެންދާ ޖިނާއީ ތަހުގީގު މިނިވަންކަމާ އެކު ބާރަށް ކުރިއަށް ގެންދިއުމަށް ޖާގަ ދިނުމަށް ކަމަށެވެ.

ހީނާ ވަނީ މިކަމާގުޅިގެން ގޯތި ލިބިފައިވާ އެއްވެސް ފަރާތެއްގެ އެއްވެސް ހައްގަކަށް އުނިކަމެއް ލިބިފައިނުވާ ކަން އަދި ނުވެސް ލިބޭނެ ކަމުގެ ޔަގީންކަން ވެސް ދެއްވާފަ އެވެ.