އިސްރާއީލުން ފަލަސްޠީނުގެ ޣައްޒާގައި ހިންގަމުން އަންނަ ގަތުލުއާންމުގެ ތެރެއިން މިހާރު ރަފަހް ސަރަހައްދަށް ދެމުން އަންނަ ހަމަލަތައް ވަގުތުން ހުއްޓައިލަން އދ.ގެ އެންމެ މަތީ ކޯޓުކަމަށްވާ އިންޓަނޭޝޭނަލް ކޯޓް އޮފް ޖަސްޓިސް (އައިސީޖޭ)އިން ހުކުރު ދުވަހު އަމުރުކޮށްފައިވަނިކޮށް، އެ އަމުރަށް ބޯލެނބުމެއް ނެތި ހޮނިހިރު ދުވަހު ޣައްޒާއަށާއި ރަފާހަށް އިސްރާއީލުން ބޮން އަޅައިފިއެވެ.

ރަފާހްގެ ހާލަތު އައިސީޖޭ އިން ކަނޑައަޅާފައި ވަނީ އިންތިހާ ގޯސްވެފައިވާ ކަމަށެވެ. އަދި  ރަފާހްގެ އޮޕަރޭޝަން ކުރިއަށް ގެންދާނަމަ އެ ހާލަތު އިތުރަށް ގޯސްވާނެ ކަމަށް އދ.ގެ އޮފިޝަލުން ފާހަގަ ކުރައްވާފައިވާމަށް އައިސީޖީގެ ރައީސް ނަވާފް ސަލާމް ވަނީ ވިދާޅުވެފައެވެ.

ޣައްޒާގެ 2.3 މިލިއަން އާބާދީގެ 85 އިންސައްތަ މީހުން، ޣައްޒާގައި އިސްރާއީލުން އުދުވާން ހިންގަން ފެށުމާ ގުޅިގެން އަމާން އައްސޭރިއަކަށް ޚިޔާރު ކުރީ ރަފާހެވެ. މި މަހުގެ 6 ވަނަ ދުވަހު އިސްރާއީލުން ރަފާހް އޮޕަރޭޝަން ފެށި ފަހުން ރަފާހު ދޫކޮށް ނުވަ ލައްކައެއްހާ މީހުން ވަނީ އެ ސަރަހައްދު ދޫކޮށް ގޮސްފަ އެވެ.

ފަލަސްތީނަށް ބޭނުންވާ ކާބޯތަކެތި ފޯރުކޮށްދިނުމަށް ބޭނުން ކުރަމުން އައި ދޮރުތައް ވަނީ އިސްރާއީލުން ބަންދުކޮށްފައެވެ. އެއީ ރަފާހް އާއި ކެރެމް ޝަލޯމް ކައިރީގައި ޣައްޒާއަށް ވަދެވެން އޮންނަ މައި ދޮރާށިތަކެވެ. އެހެންކަމުން، ފަލަސްޠީނުގެ އާއްމު ރައްޔިތުންނަށް ބޭނުންވާ ކާބޯތަކެއްޗާއި، އެހެނިހެން ސާމާނާއި ތެޔޮ ފޯރުކޮށްދިނުން ވަނީ ހުއްޓިފައެވެ.

މިސްރުގެ ރައީސް އަބްދުލް ފަތަހު އަލް ސީސީ ހުކުރު ދުވަހުގެ ރޭ އެމެރިކާގެ ރައީސް ޖޯ ބައިޑަންއާ ފޯނުން ގުޅުއްވައި ވިދާޅުވީ އދ.ގެ އެހީގެ ޓްރަކްތަކަށް، ކެރެމް ޝަލޮމަށް ދަތުރުކުރުމުގެ ހުއްދަ ދޭން އަލުން ފަށާނެ ކަމަށެވެ. ނަމަވެސް ރަފާ އަދިވެސް ބަންދުކޮށް ހަނގުރާމަ ހޫނުވެފައި ވަނިކޮށް އެހީ ފޯރުކޮށްދޭ ފަރާތްތަކަށް، އެހީ ފޯރުކޮށްދިނުމުގެ ފުރުސަތު އޮންނާނެ ކަމެއް އަދި ނޭނގެއެވެ. ޣައްޒާގެ ގޮނޑުދޮށުގައި، އެމެރިކާގެ ހިލޭ އެހީގެ ދަށުން ހަދާފައިވާ ފެންމަތީ ފާލަން މެދުވެރިކޮށް ފޮރުކޮށް ދެމުންދިޔަ އެހީ ވެސް ވަނީ މިދިޔަ ހަފްތާގައި މެދުކަނޑާލާފައެވެ.

މިދިޔަ ހުކުރު ދުވަހު، ގައުމުތަކުގެ މެދުގައި އުފެދިފައިވާ ދެބަސްވުންތައް ޞުއްލަޙަ ކުރުމަށް އުފައްދާފައިވާ  އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ވަނީ އިޒްރޭލުގެ ރަފާ އޮޕަރޭޝަން ވަގުތުން ހުއްޓާލުމަށް އަމުރުކޮށްފަ އެވެ. ކޯޓުން މިއަމުރު ނެރުނީ އެކޯޓްގެ 15 ފަނޑިޔާރުންގެ ތެރެއިން 13 ފަނޑިޔާރުންގެ އިއްތިފާގުންނެވެ. މިއީ ޣައްޒާގައި އިސްރާއީލުގެ ސިފައިން ހިންގާ ލާއިންސާނީ ޢަމަލުތައް ވަގުތުން ހުއްޓާލުމަށް އެންގި ތިން ވަނަ ފަހަރެވެ.

އައިސީޖޭއިން ހަނރގުރާމަ ހުއްޓާލުމަށް ނިންމި އިރުވެސް، އިސްރާއީލުގެ ސިފައިން ރަފާގެ ދެކުނު އަދި އިރުމަތީ ފަރާތަށް ، މީހުން ތޮއްޖެހިފައިވާ މަރުކަޒުތަކާ ދިމާއަށް ގާތްވަމުން ދިޔަކަމަށް، އެހީ ފޯރުކޮށްދިނުމުގައި ހަރަކާތްތެރިވަމުންދާ ރައްޔިތުންނާއި ޑޮކްޓަރުން ބުނެ އެވެ. ފާއިތުވި 24 ގަޑިއިރުގެ ތެރޭގައި އިސްރާއީލުން ދިން ބަޑީގެ ހަމަލާތަކުގައި ފަލަސްތީނުގެ އިތުރު 30 މީހަކު ޝަހީދުވެފައިވާ ކަމަށް ފަލަސްތީނުގެ ޞިއްޙީ އެހީތެރިން  ބުނެއެވެ.

ހަމާސްގެ ހަނގުރާމަވެރި މުޖާހިދުން ޖަމާވެފައިވާ ޖަބާލިއާ އާއި ޒީތޫން ފަދަ އުތުރާއި މެދުތެރޭގެ ސަރަހައްދުތަކުގައި ވެސް ހަނގުރާމަތައް ދަނީ ހިންގަމުންނެވެ.