ވަނުއަޓޫއަށް އައި ބިންހެލުމުގައި 14 މީހުން މަރުވެ، ލައްކައަކަށް ވުރެ ގިނަމީހުންނަށް އަސަރުކޮށްފި

ބިން ހެލުމުގައި އެ ގައުމަށް ވަނި ބޮޑުގެއްލުމެއް ލިބިފައި

ޕެސިފިކް ކަނޑުގައި އޮންނަ ވަނުއަޓޫއަށް އިއްޔެ އައި 7.3 މެގްނިޓިއުޑްގެ ބާރުގަދަ ބިންހެލުމުގައި މިހާތަނަށް 14 މީހުން މަރުވެފައިވާ ކަމަށް އެ ގައުމުން ބުނެފިއެވެ.

މަރުވި މީހުންގެ ތެރޭގައި ހޮސްޕިޓަލުގައި ތިބި މީހުންނާއި، ބިންގަނޑު ކަނޑައިގެން ދިއުމުގެ ސަބަބުން މަރުވި މީހުން ހިމެނެއެވެ.

ބިންހެލުމުގެ ސަބަބުން އަސަރު ކުރި މީހުންގެ އަދަދު 116،000 އަށް އަރާނެ ކަމަށް އދ. އިން ލަފާކޮށްފައިވާއިރު، މިހާތަނަށް 200 އަށް ވުރެ ގިނަ މީހުންނަށް ހޮސްޕިޓަލުގައި ފަރުވާ ދީފައިވެއެވެ.

ބިންހެލުމުގެ ސަބަބުން ގިނަ އިމާރާތްތަކަށް ގެއްލުން ލިބި، ކަރަންޓާއި މޯބައިލްގެ ޚިދުމަތް ކެނޑުނެވެ. އަދި ވެރިރަށް ޕޯޓް ވިލާއަށް ސަޕްލައިކުރާ ފެނުގެ ބޮޑު ދެ ރިޒާވް މުޅިން ހަލާކުވެފައިވާ ކަމަށް ސަރުކާރުން ބުނެފައިވެއެވެ.

މީހުން ހޯދުމާއި ރިލީފް އޮޕަރޭޝަންތައް ކުރިއަށްދާއިރު އާންމުން ބޭރަށް ނުކުތުން ކޮންޓްރޯލު ކުރުމަށް ހަތް ދުވަހުގެ ކުއްލި ނުރައްކަލުގެ ހާލަތު އިއުލާންކޮށްފައިވާއިރު، އިންސާނީ އެހީތައް ހިފައިގެން އަންނަ ބޯޓުތަކަށް ޚިދުމަތްދެވޭ ވަރަށް އެއާޕޯޓް ތައްޔާރުކުރެވޭނެ ކަމަށް ސަރުކާރުން ބުނެފައިވެއެވެ.

އެ ގައުމުގެ ކަމާބެހޭ ފަރާތްތަކުން މައުލޫމާތު ދޭ ގޮތުގައި މިއީ މިފަހަކަށް އައިސް އެ ގައުމަށް އައި އެންމެ ބާރު ގަދަ އެއް ބިންހެލުމެވެ.

މޫސުން ބިންހެލުން