ސަރުކާރުގެ ހަރަދު ކުޑަ ކުރަން އެޅި ފިޔަވަޅުތަކުގެ ނަތީޖާ ފެންނަން ފަށައިފި

ރައީސުލްޖުމްހޫރިއްޔާގެ އޮފީސް --

ދައުލަތުގެ ޚަރަދުތައް ކުޑަކުރުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ ނަތީޖާ ފެންނަން ފަށައިފިއެވެ. މާލީ ވުޒާރާގެ ތަފާސް ހިސާބުތަކުން ދައްކާގޮތުގައި ސަބްސިޑީއާއި އާސަންދައަށް ކުރާ ހޭދަ ވަނީ ކުޑަވެފައެވެ.

މިއަހަރުގެ މިހާތަނަށް ސަބްސިޑީއަށް ހޭދަކޮށްފައިވަނީ 3.62 ބިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 3.6 އިންސައްތައިގެ މަދުވުމެކެވެ. އަދި އާސަންދައަށް ކުރާ ހޭދަވެސް ވަނީ 0.3 އިންސައްތަ ކުޑަވެފައެވެ.

މި ޚަރަދުތައް ކުޑަވުމުގެ މައިގަނޑު ސަބަބަކީ ބޭހުގެ އަގު ކޮންޓްރޯލް ކުރުމަށާއި އާސަންދައިގެ ތެރެއިން ކުރެވޭ އިސްރާފު ކުޑަކުރުމަށް އެޅުއްވި ފިޔަވަޅުތަކެވެ.

ސަރުކާރުން ވަނީ ކުރިއަށް އޮތްތަނުގައި ސަބްސިޑީ ނިޒާމަށް އިތުރު ބަދަލުތަކެއް ގެނައުމަށް ނިންމާފައެވެ. އެގޮތުން އާންމުކޮށް އެންމެނަށް ދެވޭ ސަބްސިޑީ އުވާލައި، އެންމެ ބޭނުންޖެހިފައިވާ ފަރާތްތަކަށް ސީދާ ސަބްސިޑީ ދެވޭނެ ނިޒާމަކަށް ބަދަލުކުރުމަށް ވަނީ ނިންމާފައެވެ.

މާލީ ވަޒީރު މޫސާ ޒަމީރު ވިދާޅުވެފައިވަނީ މި ބަދަލުތައް މަރުހަލާތަކަކަށް ބަހާލައިގެން ތަންފީޒުކުރާނެ ކަމަށާއި، ރައްޔިތުންނަށް ބުރައެއް އުފުލަން ނުޖެހޭނެ ގޮތަށް މިކަންކަން ކުރިއަށް ގެންދާނެ ކަމަށެވެ.

ފިނޭންސް މިނިސްޓްރީ