މާވަށުގެ ކުނި މެނޭޖު ކުރުމަށް ވެމްކޯއިން ފުރިހަމަ އެއްބާރުލުން ދޭން އެއްބަސްވެއްޖެ

ލ. މާވަށުގެ ކުނި މެނޭޖު ކުރުމަށް ބޭނުންވާ ހުރިހާ ކަމަކަށް ވޭސްޓް މެނޭޖްމެންޓު ކޯޕަރޭޝަން (ވެމްކޯ) އިން ފުރިހަމަ އެއްބާރުލުން ދޭން އެއްބަސްވެއްޖެ އެވެ.

އެއްބާރުލުން ދިނުމާ ގުޅޭ އެއްބަސްވުމެއްގައި މާވަށު ކައުންސިލާއި ވެމްކޯއާ އެކު އެއްބަސްވުމެއްގައި މިއަދު ވަނީ ސޮއިކޮށްފަ އެވެ.

މި އެއްބަސްވުމުގައި ވެމްކޯގެ ފަރާތުން ސޮއި ކުރެއްވީ އެކުންފުނީގެ ޑެޕިއުޓީ މެނޭޖިން ޑިރެކްޓަރު ޝަހީދު އިބްރާހިމް އެވެ. އަދި މާވަށު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަހްމަދު މޫސާ އެވެ.

ވެމްކޯގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ) ޝަހީދު އިބްރާހީމް "ދެލި އޮންލައިން"އަށް ވިދާޅުވީ މާވަށު ކައުންސިލާ އެކު މިއަދު ސޮއި ކުރި އެއްބަސްވުމުގެ ދަށުން އެ ރަށުގެ ކުނި މެނޭޖު ކުރުމަށް ބޭނުންވާ އެންމެހާ ކަންކަމުގައި ވެމްކޯއިން އެއްބާރުލުމާއި އެހީތެރިކަން ދޭނެ ކަމަށެވެ.

އޭގެ އިތުރުން މާވަށުގައި ނައްތާނުލެވި ހުރި ކުނިތައް ގެންދިޔުމާއި ކުނި ކޮށި މެނޭޖު ކުރުމަށް ބޭނުންވާ ވަސީލަތްތައް ހޯދުމުގައިވެސް އެއްބަސްވުމުގެ ދަށުން އިތުރު ފަސޭހަ ވާނެ ކަމަށް ޝަހީދު ވިދާޅުވި އެވެ.

"ގިނަ ޒަމާންތަކެއް ވަންދެން ނައްތާނުލެވި ހުރި ދަނގަޑާއި ބިއްލޫރި އަދި ޕްލާސްޓިކް ފަދަ ތަކެއް އެބަހުރި. އެތަކެތި ކުނި ކޮށިން ހުސްކޮށް ވެމްކޯގެ ސެންޓަރުތަކަށް ގެންދާނެ. އެކަމަށް ކައުންސިލުން ކުރަންޖެހޭނީ ކުޑަ ހޭދައެއް. އެތަކެތި ބޭރު ކުރާނީ ވެމްކޯގެ ވެހިކަލްތަކުގަ،" ޝަހީދު ވިދާޅުވި އެވެ.

އެއްބަސްވުމުގައި ސޮއި ކުރެއްވުމަށްފަހު، މާވަށު ކައުންސިލްގެ ރައީސް އަހުމަދު މޫސާ މި ނޫހަށް ވިދާޅުވީ ރަށަށް ދިމާވެފައިވާ ކުނީގެ މައްސަލަ އަމިއްލަ އަށް ހައްލު ކުރަން ބަލާއިރު، ކަން ކުރަންވީ ގޮތުގެ ރަނގަޅު މައުލޫމާތު ނޭނގުމުގެ ސަބަބުން އިތުރު އުނދަގުލާ ކުރިމަތިލާން ޖެހޭ ކަމަށާއި އެހެންވެ، ވެމްކޯއާ އެކު ސޮއި ކުރި މި އެއްބަސްވުމުގެ ސަބުން އެކަން ހައްލުވާނެ ކަމަށެވެ.

"އެހެންވީމަ ވެމްކޯ ފަދަ ތަޖުރިބާ ހުރި ފަރާތަކާ އެކު މި އެއްބަސްވުމުގަ ސޮއި ކުރުމާ އެކު އަޅުގަނޑުމެން ކުނިކޮށި ބަލަހައްޓާ ކުދިންނަށް އިތުރު ތަމްރީނު ދީ، އެ ކުދިން މި ކަމަށް ހޭލުންތެރި ކުރެވިގެން ދާނެ. އަދި ރަށުގެ ތަރައްގީ އަށް ކައުންސިލުން ކުރާ ކަންކަމުގައި ވެމްކޯއިން އެހީތެރިވެ ދޭނެ އެމީހުންގެ ކެޕޭސިޓީ ހުރި ވަރަކުން،" މޫސަ ވިދާޅުވި އެވެ.

ވެމްކޯގެ މެނޭޖުމަންޓުން އަންނަނީ އެ ކުންފުނީގެ ހިދުމަތްތައް އިތުރަށް ފުޅާކޮށް އައު ކަންތައްތައް ތައާރަފް ކޮށްގެން ކުންފުންޏަށް ލިބޭ އާމްދަނީ އިތުރު ކުރުމަށް ގިނަ މަސައްކަތްތަކެއް ކުރަމުންނެވެ.