ސްޓެލްކޯގެ ރިސާޗް ފައުންޑޭޝަން އިފްތިތާހުކޮށްފި

ރާއްޖޭގެ ރިސާޗް އަދި އުފެއްދުންތެރިކަމުގެ ދާއިރާ އައު ހަރުފަތަކަށް ގެންދިއުމުގެ މަޤްޞަދުގައި ސްޓެލްކޯ ރިސާޗް ފައުންޑޭޝަން މިއަދު އިފްތިތާހުކޮށްފިއެވެ.

މި ފައުންޑޭޝަން އިފްތިތާހުކޮށްދެއްވީ ސްޓެލްކޯ ހެޑް އޮފީހުގައި ބޭއްވި ރަސްމިއްޔާތެއްގައި އެ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީއެވެ.

ސްޓެލްކޯ ރިސާޗް ފައުންޑޭޝަންގެ މައިގަނޑު އަމާޒަކީ ސައިންސް، ޓެކްނޮލޮޖީ، އިންޖިންޖިނިއަރިންގ، އާޓްސް އަދި މެތެމެޓިކްސް ދާއިރާތައް ކުރިއެރުވުމެވެ. މީގެ އިތުރުން، އެންމެ ޒަމާނީ ދިރާސާތަކާއި އަލަށް ތަޢާރަފުވަމުންދާ ޓެކްނޮލޮޖީތައް ހޯދައި، އެކަންކަމަށް އަހުލުވެރިވެ، ތަރައްޤީގެ މަގުގައި ކުރިއަށް ދިއުމަށް ބޭނުންވާ ހަރުދަނާ އަދި ޒަމާނީ ހައްލުތައް ހޯދައިދިނުމެވެ.

ރަސްމިއްޔާތުގައި ވާހަކަފުޅު ދައްކަވަމުން، ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ ރިސާޗް ފައުންޑޭޝަން މެދުވެރިކޮށް ޤައުމުގެ ކުރިއެރުމަށް މަސައްކަތްކުރުމަކީ އެ ކުންފުނީގެ އަމާޒު ކަމަށެވެ. އަދި ސްޓެލްކޯގައި ހުރި ޤާބިލް އިންސާނީ ވަސީލަތްތަކާއި އެހެނިހެން ވަސީލަތްތަކުގެ ބޭނުން ހިފައިގެން މި މަސައްކަތް ކުރިއަށް ގެންދެވޭނެ ކަމަށް އޭނާ ފާހަގަކުރެއްވިއެވެ.

ފަހުމީ އިތުރަށް ވިދާޅުވީ މި ފައުންޑޭޝަނަކީ ހަމައެކަނި ޖަލްސާއެއް ބާއްވައި ނިންމާލާ ތަނަކަށް ވެގެން ނުވާނެ ކަމަށާއި، ވިސްނުމާއި ފިކުރުކުރުމުގެ ތެރެއިން ޤައުމަށް މީގެ ފައިދާ އިންތިހާއަށް ކުރަންވާނެ ކަމަށެވެ.

މި ރަސްމިއްޔާތުގައި ސްޓެލްކޯ ރިސާޗް ފައުންޑޭޝަންގެ ވެބްސައިޓް ވެސް ވަނީ އިފްތިތާހުކޮށްފައެވެ.