"އޮޕަރޭޝަން ކުރަނގި" ތެރެއިން 18،000 އަށް ވުރެ ގިނަ ބިދޭސީންގެ މައުލޫމާތު އެއްކޮށްފި

ބިދޭސީންގެ މައްސަލަ ހައްލުކުރުމަށް މިދިޔަ އޭޕްރީލް މަހު ފެށި އޮޕަރޭޝަން 'ކުރަނގި'ގެ ދަށުން 18،000 އަށް ވުރެ ގިނަ ބިދޭސީންގެ ބަޔޯމެޓްރިކް މަޢުލޫމާތު އެއްކޮށްފައިވާ ކަމަށް ހޯމްލޭންޑް ސެކިއުރިޓީ މިނިސްޓްރީން މިއަދު ހާމަކޮށްފިއެވެ.

ތިން މަރުހަލާއަކަށް ބަހާލައިގެން ކުރިއަށްގެންދާ މި އޮޕަރޭޝަނުގެ ފުރަތަމަ މަރުހަލާގެ މަޤްޞަދަކީ ރާއްޖޭގައި ތިބި ހުރިހާ ބިދޭސީންނަކީ ވެސް ގަވާއިދުގެ ތެރެއިން މަސައްކަތްކުރާ ބަޔަކަށް ހެދުން ކަމަށް އެ މިނިސްޓްރީން ބުނެފައިވެއެވެ. މި މަސައްކަތް މިހާތަނަށް 194 ރަށުގައި ފަށާފައިވާއިރު، 50 ރަށެއްގައި މަސައްކަތް ވަނީ ނިމިފައެވެ.

އޮޕަރޭޝަން 'ކުރަނގި'ގެ ދަށުން ރާއްޖޭގައި މަސައްކަތްކުރާ ބިދޭސީންގެ އިނގިލީގެ ނިޝާން ނަގައި، އެ ބިދޭސީ މީހާ ވަޒީފާ އަދާކުރަނީ ރާއްޖޭގެ ޤާނޫނާއި ގަވާއިދުގެ ދަށުންތޯ ޔަޤީންކުރެވޭނެއެވެ. މި އޮޕަރޭޝަނަށް ބޭނުންވާ މަޢުލޫމާތު އެއްކުރަނީ ކައުންސިލް އިދާރާތަކުގައި ބިދޭސީންގެ ބަޔޯމެޓްރިކް ނެގުމުގެ އިންތިޒާމު ޤާއިމްކޮށްގެންނެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރާ މަސައްކަތުގެ ދަށުން، ބިދޭސީންގެ އައިޑެންޓިޓީ ދެނެގަނެ، އެ މީހުންގެ މަޢުލޫމާތު އެއްކުރުމަށް އޮޕަރޭޝަން 'ކުރަނގި' ކުރިއަށްގެންދަނީ ތިން ފިޔަވައްސަކަށް ބަހާލައިގެންނެވެ.

މި އޮޕަރޭޝަނުގެ ފުރަތަމަ އަހަރު ނިމޭއިރު، ރާއްޖޭގެ އެކި ސަރަހައްދުތަކުގައި ތިބީ ކޮން ޤައުމުތަކަކަށް ނިސްބަތްވާ، ކިތައް ބިދޭސީންތޯ އަދި އެ މީހުން މިހާރު މަސައްކަތްކުރަނީ ކާކު ސްޕޮންސަރ ދީގެންތޯ ނުވަތަ މަސައްކަތްކުރަނީ ކޮން ތަނަކުންތޯ ދެނެގަނެވޭނެއެވެ. އަދި މި މަޢުލޫމާތުގެ އަލީގައި ބިދޭސީންގެ މައި ދަފްތަރެއް އެކުލަވާލެވޭނެއެވެ.