ސޫރިޔާގެ އައު ވެރިކަމާއެކު ހުޅަނގުގެ ބާރުތަކުން މަޝްވަރާތައް ފަށައިފި

ސޫރިޔާގެ ރައީސް ބައްޝާރް އަލް-އަސަދުގެ ވެރިކަން ވައްޓާލުމަށްފަހު، ވެރިކަމާ ހަވާލުވި ހަޔިއަތު ތަޙްރީރް އަލް-ޝާމް (އެޗްޓީއެސް) އާއެކު ހުޅަނގުގެ ބާރުތަކުން މަޝްވަރާތައް ފަށާފައިވާކަން ހާމަވެއްޖެއެވެ.

އެޗްޓީއެސްގެ ހަނގުރާމަވެރިން ސޫރިޔާގެ ވެރިރަށް ދިމިޝްޤަށް އަރައި، އަސަދުގެ ވެރިކަން ނިމުމަކަށް ގެނެސްފައިވަނީ ޑިސެންބަރު 8 ވަނަ ދުވަހުއެވެ.

އަސަދުގެ ވެރިކަން ވައްޓާލުމަށްފަހު އެކުލަވާލެވުނު އިންތިޤާލީ ސަރުކާރުގެ ބޮޑުވަޒީރުކަމުގެ މަޤާމު ހަވާލުކޮށްފައިވަނީ މުޙައްމަދު އަލް-ބަޝީރާއެވެ. މަސްރަޙު ދިރާސާކުރާ ފަރާތްތަކުން ބުނެފައިވަނީ، އެޗްޓީއެސްއިން ޤާއިމުކޮށްފައިވާ އިންތިޤާލީ ސަރުކާރާއެކު މަޝްވަރާތައް ބޭއްވުމަށް ހުޅަނގުގެ ބާރުތަކުން މަސައްކަތްކުރަމުންދާ ކަމަށެވެ.

އެޗްޓީއެސްއަކީ އެމެރިކާއާއި ވިލާތުގެ ގިނަ ޤައުމުތަކުގެ އިތުރުން އދ.އިން ވެސް ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ގުރޫޕެކެވެ. ނަމަވެސް، ހުޅަނގުގެ ބާރުތަކުން މިވަގުތު ދަނީ އެޗްޓީއެސްގެ އިސް ކޮމާންޑަރު އަޙްމަދު އަލް-ޝަރާޢުއާއެކު މަޝްވަރާތައް ބޭއްވުމަށް މަސައްކަތްކުރަމުންނެވެ.

އިންތިޤާލީ ބޮޑުވަޒީރު ބަޝީރު ބުނެފައިވަނީ، ސޫރިޔާގެ ބޭރު ފައިސާގެ ރިޒަރވް ހުސްވެފައިވާ ކަމަށާއި، އެ ޤައުމަށް ކުރިމަތިވެފައިވާ މާލީ ކާރިސާއިން އަރައިގަނެވޭނީ ހުޅަނގުގެ ބާރުތަކުން އަޅާފައިވާ ދަތިކުރުމުގެ ހަރުކަށި ފިޔަވަޅުތަކަށް ލުއިދިނުމުން ކަމަށެވެ.

ބަޝީރު އިތުރަށް ބުނެފައިވަނީ، ސޫރިޔާގައި އަމަން އަމާންކަމާއި ސުލްޙަމަސަލަސްކަން ޤާއިމުކޮށްދިނުމަށް މަސައްކަތްކުރަމުންދާ ކަމަށާއި، ސޫރިޔާގެ ކުރިމަގު ބައްޓަންކޮށް ތަރައްޤީކުރުމުގައި ބައިވެރިވުމުގެ ފުރުޞަތު އެންމެންނަށް އޮންނާނެ ކަމަށެވެ.