ފީފާ ބެސްޓް އެވޯޑް ވިނީޝިއުސް ޖޫނިއާ އަށް

ދުނިޔޭގެ ފުޓްބޯޅައިގެ މައި އިދާރާ ފީފާއިން ހޮވާ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބެސްޓް އެވޯޑް، ރެއާލް މެޑްރިޑަށް ކުޅޭ ބްރެޒިލްގެ ފޯވާޑް ވިނީޝިއުސް ޖޫނިއާ އަށް ލިބިއްޖެއެވެ.

މި ފަހަރުގެ ބެސްޓް އެވޯޑްސްގެ ނޮމިނީސްގެ ތެރޭގައި ހިމެނުނީ ބެލޮންޑިއޯ އެވޯޑް ހާސިލްކުރި ރޮޑްރީ، ލިއޮނަލް މެސީ، ކީލިއަން އެމްބާޕޭ، ޖޫޑް ބެލިންހަމް، ފެޑެރީކޯ ވަލްވޭޑޭ، ޓޯނީ ކްރޫސް، ޑެނީ ކާވަހާލް، އާލިން ބްރައުޓް ހާލަންޑް އަދި ފްލޯރިއަން ވާޓްޒްއެވެ.

ވިނީޝިއުސް އަށް 48 ވޯޓު ލިބުނުއިރު، ދެވަނައަށް ދިޔަ ރޮޑްރީއަށް ލިބުނީ 43 ޕޮއިންޓެވެ. ތިންވަނަ ހޯދި ބެލިންހަމްއަށް ލިބުނީ 37 ޕޮއިންޓެވެ. ބެލޮންޑިއޯ އެވޯޑް ވިނީޝިއުސްއަށް ނުލިބުމާ ގުޅިގެން ރެއާލް މެޑްރިޑުން ވަނީ އެ އެވޯޑް ހަފުލާ ބޮއިކޮޓްކޮށްފައެވެ.

އެންމެ މޮޅު ކޯޗުގެ މަޤާމު ލިބިފައިވަނީ ރެއާލް މެޑްރިޑްގެ ކޯޗު ކާލޯ އަންޗެލޮޓީ އަށެވެ. އެންމެ މޮޅު ގޯލަށް ދޭ ޕުސްކަސް އެވޯޑް ލިބުނީ މެންޗެސްޓާ ޔުނައިޓެޑްގެ އަލެހަންދްރޯ ގާނާޗޯ އަށެވެ. އެއީ އޭނާ އެވަޓަން ކޮޅަށް ޖެހި އޯވަހެޑް ކިކަށެވެ.

އެންމެ މޮޅު އަންހެން ފުޓްބޯޅަ ކުޅުންތެރިޔާގެ މަޤާމު ލިބުނީ ސްޕެއިނާއި ބާސެލޯނާއަށް ކުޅޭ އައިޓާނާ ބޮންމާޓީ އަށެވެ. މިދިޔަ އަހަރުވެސް މި މަޤާމު ހޯދީ ބޮންމާޓީއެވެ. އަދި އެންމެ މޮޅު އަންހެން ކޯޗަކަށް ހޮވުނީ ކުރިން ޗެލްސީއަށް ކޯޗުކޮށްދީ މިވަގުތު އެމެރިކާގައި ހުރި އެމާ ހަޔެސްއެވެ.