ޕީއެސްއެމްގެ އެމްޑީކަމުން ސައީދު އިސްތިއުފާ ދެއްވައިފި

ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރު މުޙައްމަދު ސައީދު މިއަދު އިސްތިއުފާ ދެއްވައިފި އެވެ.

ސައީދު، މިއަހަރުގެ އޯގަސްޓު މަހުގެ 25 ވަނަ ދުވަހު އެ މަގާމަށް ހަމަޖެއްސީ، އެ މަގާމުގައި ކުރިން ހުންނެވި ޒީނާ ޒާހިރު މަގާމުން އިސްތިއުފާ ދެއްވުމުންނެވެ. ޒީނާ އެ މަގާމަށް ހަމަޖެއްސީ މިދިޔަ އަހަރުގެ ނޮވެމްބަރު މަހު އެވެ.

މި ދެބޭފުޅުން ވެސް އިސްތިއުފާ ދެއްކި ސަބަބު އަދި މިހާތަނަށް އެނގިފައެއް ނުވެއެވެ.

މަގާމުން މިއަދު އިސްތިއުފާދެއްވި ސައީދަކީ މީޑިއާގެ ދާއިރާއިން ތައުލީމު ހާސިލު ކުރައްވާފައިވާ ބޭފުޅެކެވެ.

ސައީދު ވަނީ މީގެ ކުރިން އެޑިއުކޭޝަން މިނިސްޓްރީގެ ސިވިލް ސާވިސްގެ އެންމެ އިސްވެރިޔާ ނުވަތަ ޕަމަނަންޓް ސެކްޓްރީ ކަމާއި ޑިރެކްޓާ ޖެނެރަލްގެ މަގާމު ވެސް އަދާ ކުރައްވާފަ އެވެ.