ބަންގާޅު ކަނޑުގައި އުފެދިފައިވާ ދެ ކޮޅިގަނޑުގެ އަސަރު ރާއްޖެއަށްކޮށް މޫސުން ގޯސްވާނެ: މެޓް

ބަންގާޅު ކަނޑުގައި ކޮޅިގަނޑެއް އުފެދި، އޭގެ އަސަރު ރާއްޖެއަށް ވެސް ފޯރާނެތީ ކަނޑުދަތުރުކުރާ ފަރާތްތަކުން ސަމާލުވުމަށް މޫސުމާބެހޭ ޤައުމީ އިދާރާ (މެޓް) އިން އިލްތިމާސްކޮށްފިއެވެ.

މިއީ ރާއްޖޭގެ ސަރަހައްދަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށާއި، މި ދުވަސްވަރު މި ސަރަހައްދުގައި ކޮޅިގަނޑުތައް އުފެދުމުގެ ފުރުސަތު އޮންނަ ކަމަށް މެޓް އިން ބުނެފައިވެއެވެ.

މެޓް އިން މަޢުލޫމާތު ދީފައިވާ ގޮތުގައި، ބަންގާޅު ކަނޑުގައި އުފެދިފައިވާ ކޮޅިގަނޑު ކުރިއަށް އޮތް ދެ ދުވަސް ތެރޭގައި ދެކުނު އިންޑިއާގެ ޓެމިލްނާޑޫގެ އައްސޭރިފަށާ ދިމާލަށް ޖެހޭނެ ކަމަށް ލަފާކުރެވެއެވެ. އަދި މި ހަފުތާ ތެރޭގައި ރާއްޖެއާ ދުރުން ދެކުނުގައި ވެސް ކޮޅިގަނޑެއް އުފެދި ހުޅަނގަށް ޖެހެމުންދާނެ ކަމަށް ބެލެވެއެވެ.

މި ދެ ކޮޅިގަނޑާ ގުޅިގެން ބުދަ ދުވަހުން ފެށިގެން ކުރިއަށް އޮތް ފަސް ދުވަހު ރާއްޖޭގެ ސަރަހައްދުގެ ވައި އާންމުކޮށް ބާރުވާނެ ކަމަށް މެޓް އިން ލަފާކޮށްފައިވެއެވެ. އެގޮތުން، ދެކުނާއި މެދު ރާއްޖޭގެ އަތޮޅުތަކަށް ގަޑިއަކު 17 މޭލާއި 27 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އުތުރުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ.

މީގެ އިތުރުން، މި ދުވަސްވަރު ގަދަ ވަޔާއެކު ވިއްސާރަކޮށް، ގުގުރުމާއެކު ވިލާގަނޑުގައި ގާތްގަނޑަކަށް ގަޑިއަކު 40-55 މޭލަށް ވައި ބާރުވުން އެކަށީގެންވާ ކަމަށާއި، ދެކުނާއި މެދު ރާއްޖެތެރޭގެ ސަރަހައްދަށް އުދައިގެ އަސަރުކުރުން އެކަށީގެންވާ ކަމަށް ވެސް މެޓް އިން ވަނީ ލަފާކޮށްފައެވެ.