ޔުނައިޓެޑުން ސިޓީ ބަލިކުރިއިރު ޗެލްސީން ލިވަޕޫލާއި ދެ ޕޮއިންޓަށް ގާތަށް ޖެހިލައިފި

ޔުނައިޓެޑުން އުފާ ފާޅުކުރަނީ

އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން ފަހު ވަގުތު ފަހަތުން އަރައި 2-1 އިން މެންޗެސްޓާ ސިޓީ ބަލިކުރި އިރު، ޗެލްސީން 2-1 އިން ބްރެންޓްފޯޑްގެ މައްޗަށް ކުރިހޯދައި ލީގުގެ އެއް ވަނައިގައި އޮތް ލިވަޕޫލާ ދެމެދު ދެ ޕޮއިންޓަށް ގާތްކޮށްފިއެވެ.

ސިޓީ މިވަނީ އެންމެ ފަހުން ކުޅުނު 11 މެޗުގެ ތެރެއިން އަށް ވަނަ މެޗުން ބަލިވެފައެވެ. މިހާރު ސިޓީ އޮތީ 16 މެޗުން 27 ޕޮއިންޓާ އެކު ފަސް ވަނައިގައެވެ. ލީގުގެ އެއް ވަނައިގައި އޮތް ލިވަޕޫލަށް 15 މެޗުން 36 ޕޮއިންޓް ލިބިފައިވާއިރު، ޗެލްސީން ވަނީ 16 މެޗުން 34 ޕޮއިންޓް ހޯދައިފައެވެ.

ސިޓީގެ އަމިއްލަ ދަނޑުގައި ޔުނައިޓެޑުން ސިޓީ ބަލިކުރި މެޗުގައި، ފުރަތަމަ ހާފުގައި ސިޓީގެ ޖޮސްކޯ ގްވާޑިއޯލް ބޮލުން ޖެހި ގޯލުން ލީޑުނެގިއިރު، މެޗުގެ 88 ވަނަ މިނިޓްގައި ޔުނައިޓެޑުގެ ބްރޫނޯ ފެނާންޑޭސް ވަނީ ޕެނަލްޓީއަކުން އެއްވަރުކޮށްފައެވެ. އަދި މެޗުގެ 90 ވަނަ މިނިޓްގައި އަމަދު ޑިއާލޯ ވަނީ ގޯލު ޖަހައި، ޔުނައިޓެޑް މޮޅުކޮށްދީފައެވެ.

ޗެލްސީން ބްރެންޓްފޯޑް ބަލިކުރި މެޗުގައި މާކް ކުކުރޭލާ އާއި ނިކޮލަސް ޖެކްސަން ވަނީ ގޯލު ޖަހާފައެވެ. ބްރެންޓްފޯޑްގެ ހަމައެކަނި ލަނޑު ޖެހީ ބްރަޔާން އެމްބުއޭމޯއެވެ. މެޗު ނިމުނު ފަހުން ހިނގައިދިޔަ ކަމެއްގެ ސަބަބުން ޗެލްސީގެ ކުކުރޭލާއަށް ވަނީ ރަތް ކާޑެއް ދައްކާފައެވެ.

އެހެން މެޗެއްގައި ޓޮޓެންހަމް އިން ވަނީ ސައުތެމްޓަން ދަނޑުގައި، ފުރަތަމަ ހާފުގައި ޖެހި ފަސް ގޯލާ އެކު، 5-0 އިން މޮޅުވެފައެވެ. މި މޮޅާ އެކު، ޓޮޓެންހަމް އޮތީ 16 މެޗުން 23 ޕޮއިންޓާ އެކު، ތާވަލުގެ 10 ވަނާގައެވެ.

އިނގިރޭސި ޕްރިމިއަރ ލީގު މެންޗެސްޓަރ ޔުނައިޓެޑް މެންޗެސްޓަރ ސިޓީ