ސީރިޔާގައި ހުރި ރަޝިޔާގެ އަސްކަރީ ދެ މަރުކަޒެއް ދޫކޮށްނުލާނެކަމަށް ބުނެފި

ސޫރިޔާގެ އުތުރުގެ އަލަވީ ފަރުބަދަތަކުގައި ހުރި އަސްކަރީ މަޤާމުތަކުން ރަޝިޔާގެ ސިފައިން ފަހަތަށް ޖެހެން ފަށާފައިވީ ނަމަވެސް، ސޫރިޔާގައި ހުންނަ ރަޝިޔާގެ ދެ އަސްކަރީ މަރުކަޒު ދޫކޮށްނުލާނެ ކަމަށް އިތުބާރުހުރި ބައެއް މަސްދަރުތަކުން ބުނެފިއެވެ.

މި ދެ މަރުކަޒަކީ އަލްލާޒިޤިއްޔާގައި ހުންނަ ޙުމީމީމް ވައިގެ މަރުކަޒާއި ޠުރްޠޫސްގައި ހުންނަ ކަނޑުގެ ސިފައިންގެ މަރުކަޒެވެ.

ހުކުރު ދުވަހުގެ ސެޓެލައިޓް މަންޒަރުތަކުން ފެންނަ ގޮތުގައި، އެންޓޮނޮވް އޭއެން-124 މަރުކާގެ ދެ އުޅަނދު ޙުމީމީމް ވައިގެ މަރުކަޒުގައި މުދާ އަރުވަމުންދާ ކަމަށް ބެލެވެއެވެ. އަދި އޭގެ ތެރެއިން އެއް މަތިންދާބޯޓު ލީބިޔާއާ ދިމާލަށް މިޞްރާބު ޖަހާފައިވާ ކަމަށްވެސް ބެލެވެއެވެ.

ރަޝިޔާއާ ގުޅުން ހުރި ސޫރިޔާގެ އަސްކަރީ އަދި ސަލާމަތީ މަސްދަރުތަކުން ބުނެފައިވަނީ ރަޝިޔާއިން ކުރީ ސަފުގައި ތިބި ސިފައިން ފަހަތަށް ޖައްސައި، ބައެއް ސާމާނުތަކާއި ސޫރިޔާގެ އިސް އޮފިސަރުން އަނބުރާ ގެންދަމުންދާ ކަމަށެވެ. ނަމަވެސް ރަޝިޔާގެ މައި ދެ މަރުކަޒު މުޅީން ދޫކޮށް ދިޔުމުގެ ވިސްނުމެއް ނެތް ކަމަށާއި، ޙާލަތު ނިއުޅެމުންދާ ގޮތަށް ބަލައި، މިހާރަށް ވުރެ ވަރުގަދައަށް އެނބުރި އައުން އެކަށީގެންވާ ކަމަށްވެސް މަސްދަރުތަކުން ބުނެފައިވެއެވެ.

ސޫރިޔާގައި މިހާރު އޮތް ވަގުތީ ސަރުކާރާ ގާތް ގުޅުމެއް އޮންނަ މަސްދަރަކުން ބުނެފައިވަނީ ސޫރިޔާގައި ރަޝިޔާ ސިފައިން ތިބުމާއި، އަސަދުގެ ސަރުކާރާއި ރަޝިޔާއާ ދެމެދު ކުރިން ވެވުނު އެއްބަސްވުންތަކާ މެދު މަޝްވަރާ ނުކުރެވޭ ކަމަށެވެ. އަދި މިއީ ކުރިއަށް އޮތް ތަނުގައި ކުރަންޖެހޭ މަޝްވަރާއެއް ކަމަށާއި، އެ ކަމުގައި އެންމެ ފަހު ބަސް ބުނާނީ ސޫރިޔާގެ ރައްޔިތުން ކަމަށްވެސް އެ މަސްދަރު ބުނެފައިވެއެވެ.

ފިނި ހަނގުރާމަ ފެށުނު ދުވަސްވަރުން ފެށިގެން، ރަޝިޔާއިން ދަނީ ސޫރިޔާއަށް ތާޢީދު ކުރަމުންނެވެ. ސޫރިޔާގައި ޤާއިމުކޮށްފައިވާ ރަޝިޔާގެ އަސްކަރީ ދެ މަރުކަޒަކީ، ދުނިޔޭގައި ރަޝިޔާގެ އަސްކަރީ ބާރު ދެމެހެއްޓުމަށް މުހިންމު ދެ މަރުކަޒު ކަމަށް ބެލެވެއެވެ.