އުޅަނދުފަހަރުގެ އަހަރީ ފީއާއި ޖޫރިމަނާ ފައިސާ ބަހާލައިގެން ދެއްކުމުގެ ފުރުޞަތު ހުޅުވާލައިފި

އެއްގަމާއި ކަނޑުގައި ދުއްވާ އުޅަނދުފަހަރުން ކޮންމެ އަހަރަކު އެއް ފަހަރު ދައްކަން ޖެހޭ ފީއާއި އަހަރީ ފީ ނުދެއްކުމުގެ ސަބަބުން އަރައިފައިވާ ޖޫރިމަނާގެ ފައިސާއާއި އެ ނޫން ވެސް ޖޫރިމަނާގެ ފައިސާ، އިންސްޓޯލްމެންޓް އުސޫލުން ބަހައިލައިގެން ދެއްކުމުގެ ފުރުސަތު ސަރުކާރުން ދީފިއެވެ.

މި ފުރުޞަތު ދިނުމަށްޓަކައި އެކުލަވާލެވުނު ގަވާއިދު މިހާރު ވަނީ ގެޒެޓުކޮށް، އަމަލުކުރަން ފަށާފައެވެ. މި ގަވާއިދުގެ ދަށުން، އަހަރީ ފީއާއި ޖޫރިމަނާ ފައިސާގެ ތެރެއިން ނުދައްކާ ހުރި ފައިސާ އެއްފަހަރާ ދެއްކުމަށް ދަތިވާ ފަރާތްތަކަށް ލުއިފަސޭހަ ގޮތެއްގައި އެ ފައިސާ ދައުލަތަށް ދެއްކުމުގެ މަގު ފަހިވެގެންދާނެއެވެ.

މި ފުރުޞަތު ހޯދުމަށް އެދޭ ފަރާތްތަކުން ޓްރާންސްޕޯޓް މިނިސްޓްރީއަށް ލިޔުމުން ހުށަހަޅަންޖެހޭނެއެވެ. ނަމަވެސް މި ފުރުޞަތު ލިބޭނީ ވަކި ޝަރުތުތަކެއް ފުރިހަމަވާ ފަރާތްތަކަށެވެ. މީގެ ތެރޭގައި ދައްކަންޖެހި ނުދައްކާ ހުރި ފައިސާގެ އަދަދު 10،000 ރުފިޔާއަށް ވުރެ އިތުރުވެފައިވުމާއި، އެ ފައިސާއަކީ ދެއްކުމުގެ ސުންގަޑި ފާއިތުވެފައިވާ ފައިސާއަކަށްވުން ހިމެނެއެވެ.

މި ގަވާއިދުގެ ދަށުން ފައިސާ ބަހައިލައިގެން ދެއްކުމަށް ހުށަހަޅާ ފަރާތްތަކުގެ ތެރެއިން، ކުރިން މިފަދަ ފުރުޞަތެއް ލިބިފައިނުވާ އަދި އުޅަނދުގެ ވެރިފަރާތް ކަމުގައިވާ ފަރާތްތަކަށް މި ފުރުޞަތު ލިބޭނެއެވެ. މި ޝަރުތުތައް ހަމަވާ ފަރާތްތަކުން، ދައްކަންޖެހޭ ފައިސާގެ އަދަދުގެ ވަކި މިންވަރެއް 'ކޮމިޓްމެންޓް ފީ'ގެ ގޮތުގައި ދެއްކުމަށްފަހު، މިނިސްޓްރީއާއެކު އެއްބަސްވުމެއް ހެދުމަށް ވަނީ ހަމަޖެހިފައެވެ.

މި އައު ގަވާއިދުގެ ދަށުން، ފައިސާ ދެއްކުމަށް އެއްބަސްވެވޭ މުއްދަތުގައި ފައިސާ ނުދައްކައިފިނަމަ، މަޤުބޫލު އުޒުރެއްނެތި 30 ދުވަސް ފާއިތުވުމުން އެއްބަސްވުން ބާޠިލުކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ. މި ފުރުޞަތުގެ ސަބަބުން، ގިނަ ފަރާތްތަކަކަށް ލުއިފަސޭހަކަމާއެކު އެމީހުންގެ ޒިންމާ އަދާކުރުމަށް މަގުފަހިވެގެންދާނެ ކަމަށް ބެލެވެއެވެ.