ދައުލަތުގެ އާމްދަނީ އިތުރުވެ، ޚަރަދުތައް މެނޭޖުކުރެވޭތަން ފެންނަށް ފށައިފި

މިއަހަރުގެ ޑިސެމްބަރުމަހުގެ 5 ވަނަ ދުވަހުގެ ނިޔަލަށް ދައުލަތުގެ ޚަރަދުތައް 43.5 ބިލިއަން ރުފިޔާއަށް އަރާފައިވާ އިރު ދައުލަތުގެ އާމުދަނީ އިތުރުވަމުން އަންނަކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

މިއަހަރުގެ ޖުމްލަ ބަޖެޓްގެ ގޮތުގައި ރައްޔިތުންގެ މަޖިލީހުން ފާސްކޮށްދީފައިވަނީ، 49.8 ބިލިއަން ރުފިޔާއެވެ. މިހާތަނަށް ކުރެވިފައިވާ ޚަރަދުތަކަށް ބަލާއިރު، ކެޕިޓަލް ޚަރަދުގެ ގޮތުގައި 12.9 ބިލިއަން ރުފިޔާ ހިނގާފައިވާއިރު، ރިކަރަންޓް ޚަރަދު އުޅެނީ 30.5 ބިލިއަން ރުފިޔާގައެވެ. މިއީ ޤައުމުގެ ތަރައްޤީއަށް ކުރެވޭ އިންވެސްޓްމަންޓްތަކާއި، އާންމު ޚިދުމަތްތައް ދެމެހެއްޓުމަށް ކުރެވޭ ޚަރަދުތައް ހަރުދަނާކޮށް ބެލެހެއްޓިފައިވާކަމުގެ ހެއްކެކެވެ.

މުސާރަ ދިނުމަށް 12.4 ބިލިއަން ރުފިޔާ ހޭދަކޮށްފައިވާއިރު، އިދާރީގޮތުން ކުރި ޚަރަދު އުޅެނީ 18 ބިލިއަން ރުފިޔާގައެވެ. މީގެ އިތުރުން، ޕީއެސްއައިޕީ ޕްރޮގްރާމްތަކަށް ވަނީ 9.2 ބިލިއަން ރުފިޔާ ޚަރަދުކޮށްފައެވެ. މިއީ ސަރުކާރުން ރާވާފައިވާ ތަރައްޤީގެ މަޝްރޫޢުތައް ހަލުވިކަމާއެކު ކުރިއަށްދާކަމުގެ ހެއްކެކެވެ.

އަހަރުގެ މިހާތަނަށް ދައުލަތުގެ ބައިތުލްމާލަށް ޓެކްސް އާއި ހިލޭ އެހީގެ ގޮތުގައި 31.8 ބިލިއަން ރުފިޔާ ލިބިފައިވެއެވެ. މީގެ ތެރޭގައި ހިމެނެނީ ޓެކްސްގެ ގޮތުގައި ލިބުނު 24.3 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި ލިބުނު 7 ބިލިއަން ރުފިޔާއެވެ. އަދި ގްރާންޓްސްގެ ގޮތުގައި 591 މިލިއަން ރުފިޔާ ވަނީ ލިބިފައެވެ. މިއީ ދައުލަތުގެ އާމްދަނީ އިތުރުކުރުމަށް ކުރެވޭ މަސައްކަތްތައް ކާމިޔާބުވަމުންދާކަމުގެ ހެއްކެކެވެ.

މިއަހަރުގެ ބަޖެޓްގައި އާމްދަނީގެ ގޮތުގައި ޖުމްލަ 33.5 ބިލިއަން ރުފިޔާ ލިބޭނޭކަމަށް ވަނީ ލަފާކޮށްފައެވެ. މިހާތަނަށް ލިބިފައިވާ އާމްދަނީއަށް ބަލާއިރު، އަހަރުގެ ނިޔަލަށް މި އަދަދަށް ވުރެ އިތުރަށް އާމްދަނީ ލިބޭނެކަމަށް ލަފާކުރެވެއެވެ. މިއީ ސަރުކާރުގެ އިޤްތިޞާދީ ސިޔާސަތުތަކުގެ ސަބަބުން ޤައުމުގެ އިޤްތިޞާދު ކުރިއަރަމުންދާކަމުގެ ހެއްކެކެވެ.