ވޭޕާއި ޑުރަގުގެ ނުރައްކަލުން މުޖުތަމައު ސަލާމަތް ކުރަންޖެހޭ

ދިވެހި މުޖުތަމައު ތަކަަކީ ވޭޕާއި މަސްތުގެ ވަބާތަކުން ސަލާމަތް ކުރެވިފައި ވާ މުޖުތަމައު ތަކަކަށް ހަދަންޖެހޭ ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ އދ. މަހިބަދޫ ރައްޔިތުންނާ ބައްދަލުކުރައްވާ މިއަދު ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ރާއްޖޭގައި މީގެ ކުރިން އިލެކްޓްރޯނިކް ސިނގިރޭޓުގެ ނުވަތަ ވޭޕްގެ ވިޔަފާރި ކުރަމުން ގެންދިޔައީ ގާނޫނީ އިމުގެ ތެރެއިން ހުއްދަ އޮވެގެން ނަމަވެސް އެކަމުގެ ސަބަބުން ގައުމަށް ބޮޑެތި ގެއްލުންތަކެއް ކުރިމަތިވަމުންދިޔަ ކަމަށެވެ.

ހާލުގެ ދުލުން އެދެމުން ދިޔައީ ގައުމުގެ ދަރިން، ވޭޕްގެ ވަބާއިން ސަލާމަތް ކޮށްދިނުމަށް ކަމުގައި ރައީސް ފާހަގަ ކުރެއްވި އެވެ.

މި މުޖުތަމައު ތަކަކީ ވޭޕާއި މަސްތުގެ ވަބާތަކުން ސަލާމަތްކުރެވިފައި ވާ މުޖުތަމައު ތަކަކަށް ހަދަންޖެހޭކަން ފާހަގަ ކުރައްވައި ރައީސް ވިދާޅުވީ އޭގެ އިތުރުން ސީއްހީ ގޮތުން ޒުވާނުންނާއި އާންމުން ސަލާމަތްތެރިކަމާ އެކު ތިބެގެން މެނުވީ ހަގީގަތުގައި މި ގައުމަށް ވެސް ކޮށްދެވޭނެ ކަމެއް ނޯންނާނެ ކަމަށެވެ.

ރައީސް ވިދާޅުވީ މުޖުތަމައުގައި ފެތުރިފައި އޮތް ނުރަނގަޅު އާދަ ތަކުން ސަލާމަތް ވެވެން އޮތީ އަޒުމާ އެކު މަސައްކަތް ކޮށްގެން ކަމަށާއި، ގާނޫނުތަކެއް ހެދިފައި ހުރި ނަމަވެސް ފޫނުބެދޭ އެތައް ކަމެއް ހުރި ކަމަށެވެ.

ބަޔަކު ކުށްވެރި ކުރުމަކީ އަދުގެ ސަރުކާރުން އެދޭ ގޮތް ނޫން ކަމަށާއި ބޭނުންފުޅު ވަނީ މަސްތުގެ ވަބާއާއި އެ ނޫންވެސް ގޮތްގޮތުން ކުށުގެވެށީގައި ބަނދެވިފައިވާ މީހުން އެކަންކަމުން ސަލާމަތްކޮށް، ހަމަމަގަށް އެޅުވިގެންކަމުގައި ރައީސުލްޖުމްހޫރިއްޔާ ވިދާޅުވިއެވެ.

އެކަމަކު،ނުބައި ނިޔަތުގައި އެފަދަ ވަބާތައް ފަތުރާ ފަރާތްތަކަށް ހައްގު އަދަބު ލިބެންޖެހޭނެ ކަމަށް އެ މަނިކުފާނު ވިދާޅުވި އެވެ.

ބަހިބަދޫގައި ވާހަކަފުޅު ދައްކަވަމުން ރައީސް ވަނީ އެ މަނިކުފާނުގެ ކުރިފުޅުމަތީގައި ކޮންމެ ރައްޔިތަކީވެސް ހަމަހަމަ ރައްޔިތެއް ކަމަށް ވިދާޅުވާވިދާޅުވުން ތަކުރާރު ކުރައްވާފަ އެވެ