ސިޔާސީ އަވައިގައި ޖެހިގެން ރީތި އާދަތައް ގެއްލެމުންދާ ކަމަށް ރައީސް މުއިއްޒު ވިދާޅުވެއްޖެ

ސިޔާސީ އަވައިގައި ޖެހިގެން ދިވެހިންގެ ތެރޭ ހުރި ރީތި އާދަތައް ގެއްލެމުންދާ ކަމަށާއި އެ އާދަތައް އަލުން އިއާދަކުރަން ޖެހިފައިވާ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އދ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު މަހިބަދުއަށް ވަޑައިގެން ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ތަރައްގީ އަކީ ހަމައެކަނި އުމްރާނީ ތަރައްގީ ނޫން ކަމަށާއި އުމްރާނީ ތަރައްގީއާ އެކު ފިކުރީ އަދި އިންސާނީ ތަރައްގީ އައުމުން ނޫނީ ގައުމަށް މާނަވީ ތަރައްގީ ނާންނާނެ ކަމަށެވެ.

ރައީސް ވިދާޅުވީ ދިވެހިންގެ ތެރޭ އޮތް ރީތި އާދަތައް އިއާދަ ނުކުރެވިއްޖެ ނަމަ "ގައުމެއް ނެތް" ކަމަށެވެ. އަދި އިހުތިރާމު ކުރުމާއި ރީތި ބަހުން ވާހަކަ ދެއްކުން ފަދަ އާދަތައް އިއާދަކުރުމަކީ ގައުމުގެ މުސްތަގުބަލަށްޓަކާ ކޮންމެހެން ކުރަންޖެހޭ ކަމެއް ކަމަށް ދެކިވަޑައިގަންނަވާ ކަމަށެވެ.

ބަވަނަވަމުންދާ ދުނިޔޭގައި އުފެދޭ ނުބައި ކަންތައް ދިވެހިންގެ ތެރެއަށް ވެސް އަންނަ ކަމަށާއި އެކަންކަމުން ސަލާމާތްވާން ޖެހޭ ކަމަށް ރައީސް ފާހަގަކުރެއްވި އެވެ. މިގޮތުން ވޭޕްގެ ވަބާ އަކީ ގައުމަށް ވަރަށް ބޮޑު ގެއްލުމެއް ވެފައިވާ ކަމެއް ކަމަށާއި، ރައްޔިތުންގެ އެދުމުގެ މަތިން މިއަދުން ފެށިގެން ވޭޕް މަނާކުރަން ނިންމާފައިވާ ކަމަށް ރައީސް ވިދާޅުވި އެވެ.