އިޒްރޭލުން ނުސައިރަތު ރެފިއުޖީ ކޭމްޕަށް ދިން ހަމަލާ ދިވެހި ސަރުކާރުން ކުށްވެރި ކޮށްފި

ގާޒާގެ ނުސައިރަތު ރެފިއުޖީ ކޭމްޕަށް ޔަހޫދީން ދިން ހަމަލާގައި ޝަހީދުވި މީހުންގެ ޖަނާޒާ -- ފޮޓޯ/ އަލްޖަޒީރާ

ހައްދުފަހަނައަޅާފައިވާ ޔަހޫދީ އިޒްރޭލު ސިފައިން ގާޒާގެ ނުސައިރަތު ރެފިއުޖީ ކޭމްޕަށް ދިން ހަމަލާ އާއި ހިންގި ގަތުލުއާއްމު ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.

ޔަހޫދީ ސިފައިން ގާޒާގެ ނުސައިރަތު ރެފިއުޖީ ކޭމްޕަށް މިދިޔަ ހުކުރު ދުވަހު ދިން ހަމަލާގައި 50 މީހުން ޝަހީދުކޮށްލައި، އެތައް ބަޔަކު ޒަހަމް ކޮށްލާފައިވާ ކަމަށް އަލްޖަޒީރާއިން ރިޕޯޓުކޮށްފައިވެ އެވެ.

އިޒްރޭލުގެ ހަމަލާ ހަރުކަށި އިބާރާތުން ކުށްވެރިކޮށް ދިވެހި ސަރުކާރުން ނެރުނު ބަޔާނުގައި ބުނަނީ ބައިނަލްއަގްވާމީ ގާނޫނު ތަކާއި ބައިނަލްއަގްވާމީ އިންސާނިއްޔަތާ ބެހޭ ގާނޫނު ތަކާ ހިލާފަށް، އާންމުންނަށް އަމާޒުކޮށް އިސްރާއީލުން ދޭ މިފަދަ ހަމަލާ ތަކުގެ ސަބަބުން ގައްޒާގެ އިންސާނީ ހާލަތު އިންތިހާއަށް ގޯސްވެފައިވާ ކަމަށެވެ.

މިފަދަ ޢަމަލުތައް ހުއްޓުވުމަށް ބައިނަލްއަގުވާމީ މުޖުތަމައުން ހަރުހަދާ އަދި އަވަސް ފިޔަވަޅު ތަކެއް އަޅަން ޖެހޭ ކަމަށް ރާއްޖެއިން ބުނެފައިވެ އެވެ.

ފަލަސްތީނުގެ ރައްޔިތުންނަށް އަދުލު އިންސާފު ހޯދުމަށާއި އެ ގައުމުގައި މިނިވަން ދައުލަތެއް ގާއިމު ކުރުމަށް ކުރާ މަސައްކަތުގައި ފަލަސްތީނުގެ ރައްޔިތުންނާ އެކު ރާއްޖެއިން އަބަދު ވެސް ދެމި އޮންނާނޭ ކަމުގެ ޔަގީންކަން ދޭ ކަމަށް ވެސް ސަރުކާރުގެ ބަޔާނުގައި ބުނެފައިވެ އެވެ.

މުޢިއްޒު ސަރުކާރު