މާމިގިލި ހޮސްޕިޓަލް ތަރައްގީ ކުރުމުގެ މަޝްރޫއު މި އަހަރު ފައްޓާނަން: ރައީސް
ރައީސް މުއިއްޒު އދ. މާމިގިލި ކައުންސިލާ ބައްދަލު ކުރެއްވުން -- ފޮޓޯ ރައީސް އޮފީސް
އަދ. މާމިގިލި ހޮސްޕިޓަލް ތަރައްގީ ކުރުމުގެ މަޝްރޫއު މި އަހަރު ފައްޓަވާނެ ކަމަށް ރައީސުލްޖުމުހުރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، އަދ. މާމިގިލީ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ މެމްބަރުންނާ ބައްދަލުކުރައްވާ ދެއްކެވި ވާހަކަފުޅުގަ އެވެ.
ދަނގެތި ކައުންސިލްގެ އިދާރާގައި މިރޭ ކުރިއަށްދިޔަ މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ކަންބޮޑުވުން ތަކާއި ރަށުގެ ތަރައްގީ އަށް ބޭނުންވާ ކަންތައްތައް ރައީސް އާ ހިއްސާ ކުރައްވާފަ އެވެ.
އެގޮތުން ހޮސްޕިޓަލް ތަރައްގީކޮށްދެއްވުމަށާއި ބަނދަރާއި މަގު ހެދުމުގެ މަސައްކަތް ރައްޔިތުން ބޭނުންވާ ގޮތަށް ކުރިއަށް ގެންގޮސްދެއްވުމަށް ކައުންސިލުން އެދިވަޑައިގެންނެވި އެވެ. މީގެ އިތުރުން ވެސް ރަށުގެ ޕޮލިސް ސްޓޭޝަން ހިންގުމަށް އިމާރާތެއް ބޭނުންވާކަން ވެސް ކައުންސިލުން ފާހަގަކުރެއްވި އެވެ.
މި ބައްދަލުކުރެއްވުމުގައި އަންހެނުންގެ ތަރައްޤީއަށް މަސައްކަތް ކުރާ ކޮމިޓީން ވަނީ އެ ބޭފުޅުންނަށް އެލަވެންސް ދިނުމާއި އެކަންކަމާ ގުޅޭ މައުލޫމާތު އޮޅުންފިލުއްވާފަ އެވެ.
މިއަދުގެ ބައްދަލުކުރެއްވުމުގައި ރައީސްގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މާމިގިލީގެ ތަރައްގީއަށް ކުރިޔަށް ގެންދާ މަޝްރޫއުތަކުގެ އެންމެ ފަހުގެ މައުލޫމާތުތައް ހިއްސާ ކުރައްވާފަ އެވެ.
މި ބައްދަލުކުރެއްވުމުގައި ރައީސް ވަނީ އަންހެނުންގެ ތަރައްގީއަށް މަސައްކަތް ކުރާ ކޮމިޓީ ތަކަށް ބޭނުންވާ ކަންކަން ކޮށްދެއްވާނެ ކަން ފާހަގަކުރައްވައި، އެކަންކަން ކުރިއަށް ގެންދިއުމަށް ކުރައްވާނެ ކަންކަމުގެ ތަފުސީލީ މައުލޫމާތު ހިއްސާ ކުރައްވާފަ އެވެ. އަދި އެމަނިކުފާނު ވަނީ ކައުންސިލުން ފާހަގަކުރެއްވި ކަންކަން ކުރިއަށް ގެންދާނެ ކަމުގައި ވިދާޅުވެފަ އެވެ.
ކޮމެންޓް