މި ސަރުކާރުން ކުރިއަށް ދާނީ ކުރިމަތި ކުރާ، އަދި ކުރުވާ ހުރަސްތައް ގިރާކުރަމުން: ރައީސް

މާތް ﷲގެ އިރާދަފުޅާ އެކު، މި ސަރުކާރުން ކުރިއަށް ދާނީ، ކުރިމަތި ކުރާ އަދި ކުރިމަތިވާ ހުރަސްތައް ގިރާކުރަމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ މިރޭ، ދަނގެތީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި، ބުރާސްފަތި ދުވަހު މާލޭގައި ހިނގި އަލިފާނުގެ ހާދިސާއަށް އިޝާރާތްކުރައްވައި ވާހަކަފުޅު ދައްކަވަމުންނެވެ.

ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމެންޓް މިނިސްޓްރީގެ އިތުރުން ސިޓީ ކައުންސިލްގެ އިދާރާއެއް ހުރި ދެ އިމާރާތް ބޭނުން ނުކުރެވޭ ގޮތަށް އަނދާ އަޅިއަށްވީ ހާދިސާއަކީ، ރައީސަށް ވެސް ފުން އަސަރުތަކެއް ކުރުވި ހާދިސާއެއް ކަމަށް އެމަނިކުފާނު ވިދާޅުވި އެވެ.

އެ ހާދިސާގައި ގެއްލުން ލިބުނު ތިން ވުޒާރާ އާއި މާލޭ ސިޓީ ކައުންސިލަކީ، އެމަނިކުފާނު ވެސް އެކި ދުވަސްވަރު އެ ތަންތަނުގައި ހިދުމަތްކުރެއްވި އިދާރާތަކެއް ކަން ފާހަގަކުރައްވަމުން، އެމަނިކުފާނު ވިދާޅުވީ، އެތައް އަހަރެއްގައި އެތައް މުވައްޒަފުންނަކާ އެކު މަސައްކަތް ކުރި އެ އިމާރާތްތައް އަނދައި، ހުލިވެ، ބިންމައްޗަށް ތިރިވީ މަންޒަރު ފެނިވަޑައިގަތުމުން އަސަރުކުރެއްވި ކަމަށެވެ.

އެކަމަކު، އެމަނިކުފާނު މި ގޮންޖެހުމާ ކުރިމަތިލެއްވީ ވަރަށް ހިތްވަރާ އެކުގައިކަމަށާއި، އެންމެން އެކީ އަތުކުރި އޮޅާލައިގެން، ބުރާސްފަތި ދުވަހުގެ ރޭ ފެއްޓެވި މަސައްކަތް މެދުކަނޑާނުލައި ކުރިއަށްގެންދެވުމުގެ ނަތީޖާއެއްގެ ގޮތުން، އިރާދަކުރެއްވިއްޔާ މާދަމާ ހެނދުނު އަށެއް ޖަހާއިރު އެ ވުޒާރާތަކުން ހިދުމަތް ދޭން ފަށާނެ ކަމަށް އެމަނިކުފާނު މިރޭ އިއުލާންކުރެއްވި އެވެ.

އޭގެ އިތުރުން މި ގޮތަށް އިންތިޒާމުތައް ހަމަޖެއްސުމުގައި މަސައްކަތް ކުރެއްވި ހުރިހާ ފަރާތްތަކަށް ރައީސް ޝުކުރު އަދާ ކުރެއްވި އެވެ.