ރާއްޖެ ފަދަ ގައުމު ތަކަށް ބައިނަލްއަގުވާމީ މާލީ އެހީތެރިކަމާއި އެއްބާލުން މުހިންމު: ޒަމީރު

މެދުއިރުމަތި ހިމެނޭގޮތުން ދުނިޔޭގެ އެކި ކަންކޮޅު ތަކުގައި ހިންގަމުން އަންނަ ހަނގުރާމައިގެ ސަބަބުން ވިޔަފާރި އާއި އިގުތިސާދަށް ދިމާވެފައިވާ ގެއްލުންތަކުން އަރައިގަތުމަށް ރާއްޖެ ފަދަ ކުދި ގައުމު ތަކަށް ބޭރުގެ މާލީ އެހީ ފޯރުކޮށްދިނުމަކީ ނުހަނު ބޭނުންތެރި ކަމެއް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

އިންޑިއާގައި މި އަހަރުގެ ގްލޯބަލް އިކޮނޮމިކް ޕޮލިސީ ފޯރަމުގައި ވާހަކަ ދައްކަވަމުން ޒަމީރު ވިދާޅުވީ، އެކިއެކި ހަނގުރާމަ ތަކުގެ ސަބަބުން ތެލާއި ކާބޯތަކެތީގެ އަގު އުފުލިި، އެކަމުގެ ސަބަބުން ރާއްޖެއަށް ވެސް މާލީ ގޮތުން ގޮންޖެހުންތަކާއި ކުރިމަތިލާންޖެހިފައިވާ ކަމަށެވެ.

އެމަނިކުފާނު ވިދާޅުވީ ކޮވިޑާ ހެދި ދުނިޔޭގެ ގިނަ ގައުމު ތަކުން ދަރަނި ނަގަން މަޖުބޫރުވި ކަމަށާއި މިހާރު އެ ގައުމު ތަކަށް ކުރިމަތިވެގެން އުޅެނީ އެ ދަރަނިތައް ބަލަހައްޓައިގެން މެނޭޖު ކުރުމުގެ މައްސަލަ ކަމަށެވެ. އަދި ވިދާޅުވީ ދަރަނި ބޮޑުވުމުގެ ސަބަބުން ކުރިމަތިވާ ގޮންޖެހުން ތަކުން އެންމެ ނާޒުކު ހާލަތުގައި ދިރިއުޅެމުން އަންނަ ފަރާތްތައް ރައްކައުތެރި ކުރާން ޖެހޭ ކަމަށެވެ.

މި ފޯރަމްގައި މިނިސްޓަރު ޒަމީރު ވަނީ، ދަރަނި ބެލެހެއްޓުމާއި އާމްދަނީ އިތުރު ކުރުމަށް ދެމެހެއްޓެނިވި ގޮތް ތަކެއް ހޯދާން ޖެހޭ ކަން ފާހަގަ ކުރައްވާފަ އެވެ.

ޒަމީރު ވިދާޅުވީ ރާއްޖޭގައި އިއާދަކުރަނިވި ހަކަތައިގެ މިންވަރު އިތުރުކޮށް، މޫސުމީ ބަދަލު ތަކުން އަރައިގަނެ ތަރައްގީ ގެނައުމަށް ކުރަމުންދާ މަސައްކަތް ތަކުގައި ކަނޑައަޅާފައިވާ އަމާޒަށް ވާސިލުވާން ބޭރު ގައުމު ތަކުގެ އެހީތެރިކަން މުހިންމު ކަމަށެވެ.

ފިނޭންސް މިނިސްޓަރު އިތުރަށް ވިދާޅުވީ، ރާއްޖޭގައި ބޭނުންކުރާ ހަކަތައިގެ 33 އިންސައްތަ އަކީ އިއާދަ ކުރަނިވި ހަކަތައަށް ބަދަލު ކުރަން އަމާޒު ހިފާފައިވާއިރު، މިފަދަ ލަނޑުދަނޑިތައް ހާސިލް ކުރަން ގުޅިގެން މަސައްކަތް ކުރަން ޖެހޭ ކަމަށެވެ.