ކުންފުނީގެ މުވައްޒަފުންނަކީ ގައުމަށް ދިމާވާ ބޮޑެތި ކަންކަމުގައި ނަމޫނާ ދައްކާ ބައެއް: ސްޓެލްކޯ

ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ މުވައްޒަފުންނަކީ ގައުމަށާއި ރައްޔިތުންނަށް ދިމާވާ ކޮންމެ ކަމަކީ ގައުމީ ޒިންމާއެއްގެ ގޮތުގައި ދެކި، ނަމޫނާ ދައްކަމުންދާ ފަހުރުވެރި މުވައްޒަފުންތަކެއް ކަމަށް އެ ކުންފުނިން މިއަދު ބުނެފި އެވެ.

ސްޓެލްކޯއިން މިހެން ބުނެފައިވާއިރު، މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި އަނދާ ހުލިވި ތިން މިނިސްޓްރީގެ މަސައްކަތް ވަގުތީ ގޮތުން ދަރުބާރުގޭގައި ފެށުމަށް ޓަކައި އެ ތަންތަނަށް ބޭނުންވާ ކަރަންޓު ލުމުގައި އެ ކުންފުނީގެ މުވައްޒަފުން އަންނަނީ ވަރަށް ބުރަކޮށް މަސައްކަތް ކުރަމުންނެވެ.

ގައުމީ ކަރަންޓު ފުންފުނި، ސްޓެލްކޯއިން ބުނީ އަލިފާނުގެ ހާދިސާއާ ގުޅިގެން ހިދުމަތް މެދުކެނޑިފައިވާ ތިން މިނިސްޓްރީގެ މަސައްކަތްތައް އަލުން ފެށުމަށް ޓަކައި، ދަރުބާރުގޭގައި އެ ކުންފުނީގެ މުވައްޒަފުން ހަރަކާތްތެރިވަމުން އަންނަ ކަމަށެވެ.

އެހެންވެ، ސްޓެލްކޯއިން ވަނީ އެ ކަންކަމުގެ ތެރެއިން ކަރަންޓާ ގުޅުން ހުރި އެންމެހައި މަސައްކަތް ތަކާއި، އެހެނިހެން ދާއިރާ ތަކުން އެހީތެރިކަން ބޭނުންވާ ކަންކަމުގައި ކުންފުނީގެ މުވައްޒަފުން ދެމުން ގެންދާ އެހީތެރި ކަމަށް އިހުލާސްތެރިކަމާ އެކު ޝުކުރު ދަންނަވާފަ އެވެ.

"މި ކުންފުނީގެ މުވައްޒަފުންނަކީ ގައުމަށާއި ރައްޔިތުންނަށް ދިމާވާ މިފަދަ ކޮންމެ ކަމަކީ ގައުމީ ޒިންމާއެއްގެ ގޮތުގައި ދެކި، ނަމޫނާ ދައްކަމުންދާ ފަހުރުވެރި މުވައްޒަފުންތަކެއް" ސްޓެލްކޯއިން ބުންޏެވެ.

މިދިޔަ ބުރާސްފަތި ދުވަހު ހެނދުނު 6:30 ހާއިރު ހައުސިން މިނިސްޓްރީ ހިންގަމުން އަންނަ އިމާރާތުގެ ފުރަތަމަ ފަންގިފިލާގައި ރޯވި އަލިފާން، ފެތުރި އެ އިމާރާތް ވަނީ އަނދާ އަޅިއަށް ވެފަ އެވެ. އަދި އެންވަޔަރުމެންޓް މިނިސްޓްރީ ހިންގައި "ގްރީން ބިލްޑިން"އަށް އެ އަލިފާން ފެތުރި އެ އިމާރާތުގެ ބޮޑު ބައެއް ވެސް ވަނީ އަނދާފަ އެވެ.

އެމްއެންޑީއެފް ފަޔާ އެންޑް ރެސްކިއު ޓީމުގެ މަސައްކަތުން އެ އަލިފާން ނިއްވައިލެވުނީ ހަތަރު ގަޑިއިރު ފަހުންނެވެ. އޭރު ވަނީ  މުޅި ތަން އަނދައި ހުލިވެފަ އެވެ.