އިބްތިދާއީ ސިއްހީ ހިދުމަތުގެ ނިޒާމު ރ. އަތޮޅުގައި ފަށައިފި

ޕްރޮގްރާމު ފެށުމުގެ ހަރަކާތުގައި ސިއްހަތާއި ބެހޭ ވަޒީރު ބައިވެރިވެ ވަޑައިގަންނަވަނީ

ޕްރައިމަރީ ހެލްތު ކެއަރ ނުވަތަ އިބްތިދާއީ ސިއްޙީ ޚިދުމަތުގެ ނިޒާމު ދިރުވާ އާލާކުރުމުގެ ގޮތުން ކުރިއަށްގެންދާ ޕްރޮގްރާމް ރ. އަތޮޅުގައި ފަށައިފިއެވެ.

މި ޕްރޮގްރާމް އެ އަތޮޅުގައި ފަށްޓަވައިދެއްވީ ޞިއްޙީ ވަޒީރު ޢަބްދުﷲ ނާޡިމެވެ.

މި ނިޒާމަކީ ރާއްޖޭގައި ގައިންގަޔަށް ނާރާ ބަލިތައް މަދުކޮށް، އެ ބަލިތައް އަވަހަށް ދެނެގަނެ، ރައްޔިތުންނާ ގާތުން ފެންވަރު ރަނގަޅު ވަށާޖެހޭ ޚިދުމަތެއް ފޯރުކޮށްދިނުމަށް ފެށި ޕްރޮގްރާމެކެވެ. މިއަހަރުގެ ތެރޭގައި 5 އަތޮޅެއްގައި މި ޕްރޮގްރާމް ކުރިއަށް ގެންގޮސްފައިވާއިރު، 2025 ވަނަ އަހަރު ރާއްޖޭގެ ހުރިހާ އަތޮޅަކަށް މި ޕްރޮގްރާމް ފުޅާކުރުމަށް ސަރުކާރުން ވަނީ އަމާޒު ހިފާފައެވެ.

މި ޕްރޮގްރާމުގެ ދަށުން 18 އަހަރުން މަތީގެ ކޮންމެ ރައްޔިތެއްގެ މެޑިކަލް ހިސްޓްރީ ނެގުމަށް ވަނީ ހަމަޖެހިފައެވެ. އަދި ސިއްޙީ ޚިދުމަތްތެރިން ގޭގެއަށް ޒިޔާރަތްކޮށް، ސިއްޙީ މަޢުލޫމާތު ފޯރުކޮށްދީ، އެކިއެކި ބަލިތަކަށް ފަރުވާ ހޯދަމުންދާ ފަރާތްތަކަށް ލަފަޔާއި އިރުޝާދު ދޭނެއެވެ.

ދުނިޔޭގެ ސިއްޙަތު ޖަމިއްޔާއިން އިރުޝާދު ދެއްވާ ގޮތުގައި، އިބްތިދާއީ ސިއްޙީ ނިޒާމަކީ ރައްޔިތުންނާ ގާތުން ހަމަހަމަކަމާއެކު ސިއްޙީ ޚިދުމަތް ދިނުމަށް އެންމެ އިތުބާރު ހުރި ނިޒާމެވެ. މި ނިޒާމު ތަންފީޒުކުރުމަށް އަތޮޅުތަކަށް ދަތުރުކުރާ ޓީމުގައި ސިއްޙީ ދާއިރާގެ ފަންނީ އަދި ތަޖުރިބާ ލިބިފައިވާ ބޭފުޅުން ހިމެނޭކަމަށް ސިއްޙަތާބެހޭ ވުޒާރާއިން ވިދާޅުވެފައިވެއެވެ.

ސިއްޙަތު ޞިއްޙަތާއި ބެހޭ ވަޒީރު ޢަބްދުﷲ ނާޒިމް