ސީ-ޓު-އެއާ ކާގޯ މިހާރު ތިން ގައުމަކުން ގެނެސް އެހެން ގައުމު ތަކަށް އެކްސްޕޯޓް ކުރޭ

ސީ-ޓު-އެއަރ ކާގޯ ގެ ޚިދުމަތް ދަނީ ފުޅާވަމުން

ސީ-ޓު-އެއަރ ކާގޯގެ ގޮތުގައި ދުނިޔޭގެ ތިން ޤައުމަކުން ގެންނަ މުދާ މިހާރު ރާއްޖެއިން އެހެން ޤައުމުތަކަށް އެކްސްޕޯޓްކުރަމުންދާކަމަށް މޯލްޑިވްސް ސްޓޭޓް ޝިޕިން ކުންފުނީގެ މެނޭޖިންގ ޑިރެކްޓަރ އަދި ސީއީއޯ އަޙްމަދު ޝަރީފް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޝަރީފް ވިދާޅުވީ، ސީ-ޓު-އެއަރ ކާގޯގެ ޚިދުމަތަކީ ރާއްޖޭގެ އިޤްތިޞާދު ފުޅާކުރުމުގައި ވަރަށް މުހިންމު ޚިދުމަތެއްކަމަށެވެ. މި ޚިދުމަތް ފެށުނީ އެންމެ ފުރަތަމަ ޓާކިޝް އެއަރލައިންސްއާއެކު ބަންގްލަދޭޝްއިން އެކަނި ކަމަށާއި، މިހާރު 11 އެއަރލައިނަކުން މި ޚިދުމަތް ދެމުންދާ ކަމަށް އޭނާ ފާހަގަކުރެއްވިއެވެ.

"މިހާރު ބަންގްލަދޭޝްއިން އެކަންޏެއްނޫން އަންނަނީކީ އިންޑިއާއިން ލަންކާއިންވެސް އެބައާދޭ," ޝަރީފް ވިދާޅުވިއެވެ.

ސީ-ޓު-އެއަރ ކާގޯ ޚިދުމަތަކީ ރާއްޖެއަށް ކަނޑުމަގުން ގެންނަ މުދާ ރައްކާތެރިކަމާއެކު ބޭނުންވާ މަންޒިލަށް ވައިގެ މަގުން އަވަހަށް ފޯރުކޮށްދިނުމަށް، އެމް.ޕީ.އެލް، އެމްއޭސީއެލް، ކަސްޓަމްސް އަދި އެމްއެސްއެސް ގުޅިގެން ފަށާފައިވާ ޚިދުމަތެކެވެ.

މި ޚިދުމަތް މެއި މަހު ފެށުނު ފަހުން މިހާތަނަށް 3 މިލިއަނަށްވުރެ ގިނަ އެމެރިކާ ޑޮލަރު ރާއްޖޭގެ އިޤްތިޞާދަށް ވަދެފައިވާކަން ކުރިން ހާމަކޮށްފައިވެއެވެ. ޝަރީފް ވިދާޅުވީ މި ޚިދުމަތް އިތުރަށް ފުޅާކުރެވިއްޖެނަމަ، ރާއްޖެއަށް އިތުރު ބޭރުފައިސާ ވެއްދުމަށް ވަރަށް މުހިންމު ދައުރެއް އަދާކުރާނެ ކަމަށެވެ.

އެމްއޭސީއެލް