ވައި ބާރުވެ ކަނޑުތައް ގަދަވާނެކަމަށް ބަލާ ދެކުނުގެ ދެ ސިޓީއަށް ވައިޓް އެލާޓް ނެރެފި

ރާއްޖޭގެ ދެކުނުގެ ދެ ސިޓީއަށް ވަނީ ހުދު ސަމާލު ނެރެފައި

ވައި ބާރުވެ ކަނޑުތައް ގަދަވާނެކަމަށް ބަލާ ދެކުނުގެ ދެ ސިޓީއަށް މޫސުމާ ބެހޭ ގައުމީ އިދާރާ (މެޓް އޮފީސް)އިން ވައިޓް އެލާޓް ނެރެފިއެވެ.

މި އެލާޓް ދެމިއޮންނާނީ މިރޭ 7:00 އިން ފެށިގެން ދަންވަރު 1:00 އާ ހަމައަށެވެ.

މެޓް އޮފީހުން މަޢުލޫމާތު ދިންގޮތުގައި މި ވަގުތުތަކުގައި ފުވައްމުލަކު ސިޓީއިން ފެށިގެން އައްޑޫ ސިޓީއާ ހަމައަށް ގަޑިއަކު 19 މޭލާއި 24 މޭލާ ދެމެދުގެ ބާރު މިނުގައި ވައި ގަދަވާނެކަމަށް ލަފާކުރެވެއެވެ. އަދި މި ސަރަހައްދުތަކުގައި ކަނޑު ގަދަވުމުގެ އިންޒާރުވެސް ދީފައިވެއެވެ.

މީގެއިތުރުން، މެޓް އޮފީހުން ބުނެފައިވަނީ މާދަމާ ހެނދުނު 6:00 އާ ހަމައަށް އުތުރާއި ދެކުނުގެ އެކި ހިސާބަށް ވިއްސާރަކުރުމާއެކު ގުގުރާނެ ކަމަށެވެ. އުތުރުގެ ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށާއި މެދުރާއްޖެތެރޭގެ ބައެއް ރަށްތަކަށް ކެރީގެ އަސަރު ފޯރާނެ ކަމަށްވެސް ލަފާކޮށްފައިވެއެވެ.

މޫސުން ގޯސްވެފައިވާ މި ދުވަސްވަރު، ކަނޑުދަތުރުކުރާ ފަރާތްތަކުން ސަމާލުވުމަށާއި، އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށް މެޓް އޮފީހުން އިލްތިމާސްކޮށްފައިވެއެވެ.

މޫސުން