މަސީ، އޮތީ ކޮންސްޓްރަކްޝަން މިނިސްޓްރީއަށް އެހީތެރިކަން ފޯރުކޮށްދޭން ތައްޔާރަށް

އަލިފާނުގެ ސަބަބުން ކޮންސްޓްރަކްޝަން މިނިސްޓްރީ އެއްކޮށް ވަނީ ހަލާކުވެފައި

އިއްޔެ ކޮންސްޓްރަކްޝަން މިނިސްޓްރީ ހިންގާ އިމާރާތުގައި ހިނގި އަލިފާނުގެ ހާދިސާއާ ގުޅިގެން މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އިން އެ މިނިސްޓްރީއަށް ވެވެން އޮތް ހުރިހާ އެހީތެރިކަމެއް ފޯރުކޮށްދޭނެ ކަމަށް ބުނެފިއެވެ.

"ކޮންސްޓްރަކްޝަން މިނިސްޓްރީއަކީ އަޅުގަނޑުމެންގެ މުހިންމު ސިނާޢަތާ ގުޅުންހުރި ސަރުކާރުގެ އިދާރާ. މި ހާދިސާއާ ގުޅިގެން ސިނާޢަތުގެ މަސައްކަތްތަކަށް ދިމާވެދާނެ ގޮންޖެހުންތަކާމެދު އަޅުގަނޑުމެން ކަންބޮޑުވަން. މި ދަތި ވަގުތުގައި އަޅުގަނޑުމެން މިނިސްޓްރީއާއެކު ތިބޭނެކަން ޔަގީންކޮށްދެން. މިނިސްޓްރީއަށް ހުރިހާ ގޮތަކުން އެހީވާނަން." މަސީން ނެރުނު ބަޔާނެއްގައި ބުނެފައިވެއެވެ.

މީގެ އިތުރުން، މިނިސްޓްރީގެ މުހިންމު މަސައްކަތްތައް ކުރިއަށް ގެންދިއުމަށް އެހީތެރިވުމަށާއި، މި ހާދިސާގެ ސަބަބުން މުޖުތަމަޢުއަށް ކުރާނެ އަސަރު ކުޑަކުރުމަށް މަސައްކަތްކުރާނެ ކަމަށް މަސީން ބުނެފައިވެއެވެ. އަދި މިނިސްޓްރީއަށް އަލުން އިމާރާތް ކުރުމަށް މަސީގެ ފުރިހަމަ އެއްބާރުލުން ލިބޭނެ ކަމަށްވެސް އެ ޖަމްއިއްޔާއިން ހާމަކޮށްފައިވެއެވެ.

މި ހާދިސާގައި ކޮންސްޓްރަކްޝަން މިނިސްޓްރީގެ އިތުރުން ހައުސިންގ މިނިސްޓްރީ އަދި އެހެނިހެން ސަރުކާރުގެ އިދާރާތައް ހިންގާ އިމާރާތަށް ގެއްލުން ލިބިފައިވާ ކަމަށް ވެސް މަސީން ފާހަގަކޮށްފައިވެއެވެ. ނަމަވެސް އެއްވެސް މީހަކަށް އަނިޔާއެއް ނުވާކަން ފާހަގަކޮށް، ކުއްލި ހާލަތުގައި އެހީތެރިވި ފަރާތްތަކަށް ޝުކުރު އަދާކޮށްފައިވެއެވެ.

ކޮންސްޓްރަކްޝަން މިނިސްޓަރު އަލިފާނުގެ ހާދިސާ