ޔުނައިޓެޑް އަދި ޓޮޓެންހަމް ޔޫރޮޕާ ލީގުގައި ކުރިއަށް

ޔުއެފާ ޔޫރޮޕާ ލީގުގައި ރޭ ކުޅުނު މެޗުތަކުގައި މެންޗެސްޓާ ޔުނައިޓެޑް އިން ވިކްޓޯރިއާ ޕްލެޒެން އަތުން 2-1 އިން މޮޅުވި އިރު، ޓޮޓެންހަމް ހޮޓްސްޕާސް އިން 1-1 އިން ރޭންޖާސްއާ އެއްވަރުކޮށްފިއެވެ.

ވިކްޓޯރިއާ ޕްލެޒެން އާއި ޔުނައިޓެޑް ދެމެދު ކުޅުނު މެޗުގައި ފުރަތަމަ ލީޑު ނެގީ ޕްލެޒެން އެވެ. އެޓީމަށް މި ލަނޑު ކާމިޔާބު ކޮށްދިނީ ދެވަނަ ހާފުގެ ކުރީކޮޅު ޔުނައިޓެޑްގެ ގޯލްކީޕަރު އަންދްރޭ އޮނާނާ އަށް ހެދުނު ގޯހެއްގެ ފައިދާ ނަގައި، ކުރީގެ ބާންލީ ފޯވާޑް މަޓޭޔާ ވީޑްރާ އެވެ.

ނަމަވެސް، ޔުނައިޓެޑުން ވަނީ  ޑެންމާކުގެ ފޯވާޑް ރަސްމުސް ހޮއިލުންޑްގެ ދެ ގޯލާއި އެކު ފަހަތުން އަރާ 2-1 ގެ ނަތީޖާއަކުން މޮޅުވެފައެވެ. މި މެޗުގައި އޭނާ ކުޅެން އަރާފައި ވަނީ ބަދަލު ކުލުންތެރިއެއްގެ ގޮތުގައެވެ. އަދި   މި ދެ ލަނޑާއި އެކު މި މުބާރާތުގައި ހޮއިލުންޑް މިހާތަނަށް މިވަނީ ފަސް ގޯލު ޖަހާފައެވެ.

ރުބެން އަމޮރިމް ޔުނައިޓެޑްގެ ކޯޗުކަމާ ހަވާލުވި ފަހުން އެ ޓީމުން ޔޫރޮޕާ ލީގުގައި ކުޅުނު ދެ މެޗުންވެސް މޮޅުވެފައިވެއެވެ. މިހާރު ޔުނައިޓެޑް ވަނީ ހަ މެޗުން 12 ޕޮއިންޓް ހޯދައި، ހަތްވަނަ އަށް އަރާފައެވެ. މި ނަތީޖާއާއެކު ޔުނައިޓެޑް އަށް ވަނީ ޔޫރޮޕާ ލީގުގެ ގަދަ 16 ބުރަށް ސީދާ ގޮތުން ކޮލިފައިވުމުގެ ފުރުސަތު އިތުރުވެފައެވެ.

އަނެއް މެޗުގައި އަށްވަނައިގައި އޮތް ޓޮޓެންހަމް އާއި ނުވަވަނައިގައި އޮތް ރޭންޖާސް ދެމެދު ކުޅުނު މެޗު ދިޔައީ ވަރަށް ފޯރިގަދަކޮށެވެ. ދެވަނަ ހާފު ފެށިތާ 81 ސިކުންތު ތެރޭގައި ރޭންޖާސް އަށް ލީޑު ނަގައިދިނީ ހަމްޒާ އިގަމާނޭ އެވެ. ނަމަވެސް މެޗުގެ 75 ވަނަ މިނެޓުގައި ޓޮޓެންހަމްގެ ޑޭޖާން ކުލުސެވްސްކީ އިން ޖެހި ގޯލަކުން މެޗު ނިމުނީ 1-1 އިން އެއްވަރުވެފައެވެ.