އަލިފާނުގެ ހާދިސާ ހިނގުމުން މަސްވެރިންގެ ދުވަހުގެ ޖަލްސާ ފަސްކޮށްފި

ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގަމުން ދިޔަ، މ. ގްރީން ބިލްޑިންގައި މިއަދު ހިނގި އަލިފާނުގެ ހާދިސާއާ ގުޅިގެން، މަސްވެރީންގެ ދުވަހުގެ ޖަލްސާ ފަސްކޮށްފި އެވެ.

ފިޝަރީޒް މިނިސްޓްރީން ނެރުނު ނޫސް ބަޔާނުގައި ބުނީ އަލިފާނުގެ ހާދިސާއާ ގުޅިގެން ދަރުބާރުގޭގައި ހުކުރު ދަވަހުގެ ރޭ ބޭއްވުމަށް ހަމަޖެއްސި ރަސްމީ ޖަލްސާ ފަސްކޮށްފައިވާ ކަމަށެވެ. އަދި ޖަލްސާ ބާއްވާނެ ދުވަހެއް ފަހުން ހިއްސާ ކުރާނެ ކަމަށް ވެސް ބުނެފައިވެ އެވެ.

މިއަދު ހެނދުނު 6:30 ހާއިރު ހައުސިން މިނިސްޓްރީ ހިންގަމުން އަންނަ އިމާރާތުގެ ފުރަތަމަ ފަންގިފިލާގައި ރޯވި އަލިފާން، ފެތުރި އެ އިމާރާތް ވަނީ އަނދާ އަޅިއަށް ވެފަ އެވެ.

އެ ހާދިސާގައި އެންވަޔަރުމެންޓް މިނިސްޓްރީ ހިންގާ "ގްރީން ބިލްޑިން"އަށް ވެސް އެ އަލިފާން ފެތުރި އެ އިމާރާތުގެ ބޮޑު ބައެއް ވަނީ އަނދާފަ އެވެ.

އަލިފާން ރޯވުމާ ގުޅިގެން ގެދޮރު ދޫކޮށްލަން ޖެހުނު 29 މީހަކު މިހާރު ވަނީ ވަގުތީ ހިޔާތަކަށްް ބަދަލުކޮށްފަ އެވެ.

އެއީ، 15 ފިރިހެނުންނާއި 14 އަންހެނުންނެވެ.