މަސައްކަތުގެ 73 ޕަސެންޓް ނިންމާ، މެމްބަރުން ޗުއްޓީއަށް

ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރުގެ މަސައްކަތް ނިންމާލުމަށްފަހު، މެންބަރުންްގެ ޗުއްޓީ މިއަދު ފަށައިފި އެވެ.

މިއަދު ބެއްވި މަޖިލީހުގެ ތިން ވަނަ ދައުރުގެ އެންމެ ފަހު ޖަލްސާ ނިންމާލެއްވުމުގެ ގޮތުން ވާހަކަފުޅު ދައްކަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މަޖިލީހަށް ހުށަހެޅިފައިވާ މަސައްކަތުގެ ޖުމުލަ 73.3 ޕަސެންޓް ޕަސެންޓް މަސައްކަތް މި ދައުރުގެ ނިޔަލަށް ވަނީ ނިންމިފައި ކަމަށެވެ.

"ތިން ވަނަ ދައުރުގަ ޖުމުލަ 27 ޖަލްސާ ބޭއްވިފައިވޭ. މަޖިލީހުގެ ޖަލްސާތަކުގައި ޖުމުލަ 67 ގަޑިއިރު ހޭދަވެފައި ވޭ. ކޮމިޓީތަކުގެ މަސައްކަތް ތަކަށް ބަލާލާއިރު، 165 ބައްދަލުވުން ވަނީ ބޭއްވިފައި. ކޮމިޓީ ތަކުގެ ބައްދަލުވުން ތަކުގައި 118 ގަޑިއިރު ހޭދަ ކުރެއްވިފައިވޭ،" އަބްދުއްރަހީމް ވިދާޅުވި އެވެ.

ރައްޔިތުންގެ މަޖިލީހުގެ މި ދައުރުގެ މުއްދަތު ހަމަވީ މިދިޔަ މަހުގެ 30 ވަނަ ދުވަހަށެވެ. ނަމަވެސް ނުނިމި ހުރި މަސައްކަތްތައް ނިންމުމަށް މެންބަރުންގެ ވޯޓަކާއެކު މި މަހުގެ 15ވަނަ ދުވަހާ ހަމައަށް ވަނީ ދައުރު ދަންމާލާފަ އެވެ.

މަޖިލީހުގެ އަންނަ އަހަރުގެ ފުރަތަމަ ދައުރު ފަށާނީ ފެބްރުއަރީ މަހު އެވެ.