މަގު ބަންދުކޮށް، މުޒާހަރާ ކޮށްގެން ހައްޔަރު ކުރި ޓެކްސީ ޑްރައިވަރުން ދޫކޮށްލަން ގޮވައިލައިފި

ހުޅުމާލެއިން ހައިވޭއަށް އަރާ ސަރަހައްދު، ބަންދުވާ ގޮތަށް މުޒާހަރާ ކޮށްގެން ރޭ ހައްޔަރު ކުރި ޓެކްސީ ޑްރައިވަރުންނާއި ޓޯ ކުރި އުޅަނދުތައް ދޫކޮށްލަން އެމްޑީޕީގެ ޗެއާޕާސަން ފައްޔާޒު އިސްމާޢީލް ގޮވައިލައްވައިފި އެވެ.

ވެހިކަލް ތަކަށް ހައިވޭ އަށް ނޭރޭ ގޮތަށް ޓެކްސީ ޑްރައިވަރުން މަގު ބަންދު ކުރީ ރޭ 9:00 ހާއިރު އެވެ.

އެކަމަކު، ގިނައިރުތަކެއް ނުވަނީސް ފުލުހުންގެ ކޮންޓްރޯލްގެ ދަށަށް އެތަން ގެނެސް، މުޒާހަރާގައި އިސްކޮށް އުޅުނު ބައެއް މީހުން ހައްޔަރު ކުރި އެވެ. އަދި މަގު ބްލޮކު ކުރި ޓެކްސީތައް ޓޯ ވެސް ކުރި އެވެ.

މިކަމާ ގުޅުވައި، ޓްވިޓާގައި ކުރެއްވި ޕޯސްޓުގައި ފައްޔާޒު ވަނީ ސަރުކާރުން ޓެކްސީ ލައިނެއް ފެށުމާ މެދު ހިތްހަމަނުޖެހުން ފައުޅު ކުރުމަށް އިހުތިޖާޖު ކުރި ޓެކްސީ ޑްރައިވަރުން ތަކެއް ހައްޔަރުކޮށް ކާރުތައް ޓޯ ކޮށްފައިވާތީ އެކަމުގެ ކަންބޮޑުވުން ފައުޅު ކުރައްވާފަ އެވެ.

ފައްޔާޒު ވިދާޅުވީ އިހުތިޖާޖު ކުރުމަށް ޓަކައި ހަޅުތާލު ކުރުމަކީ ކޮންމެ މީހަކަށް ގާނޫނު އަސާސީން ކަށަވަރު ކޮށްދޭ ހައްގެއް ކަމަށެވެ.

"ހަޅުތާލު ކޮށްގެން ހައްޔަރު ކުރި ހުރިހާ ޓެކްސީ ޑްރައިވަރުން ދޫކޮށްލައި ޓޯކުރި ވެހިކަލްތައް ވެރިފަރާތްތަކާ ހަވާލު ކުރުމަށް ގޮވާލަން" ފައްޔާޒު ވިދާޅުވި އެވެ.

ފުލުހުން ބުނެފައި ވަނީ ޓޯކުރީ ހުޅުމާލެއިން މާލެ އަންނަން އޮންނަ ހައިވޭއަށް އަރާ މަގު ބަންދުވާ ގޮތަށް އެތަނުގައި ބޭއްވި 22 ކާރު ކަމަށެވެ. އަދި އެތަނުން ތިން މީހަކު ހައްޔަރު ކުރި ކަމަށެވެ.

ހައްޔަރުކުރި ތިން މީހުން ކޯޓަށް މިއަދު ގެންދިއުމުން އެތަނުން އެކަކު، ޝަރުތު ކުރުމަށްފަހު ދޫކޮށްލާފައިވާ ކަމަށާއި އަނެއް ދެ މީހުން ފަސް ދުވަހަށް ބަންދު ކޮށްފައިވާ ކަމަށް ވެސް ފުލުހުން ބުނެ އެވެ.