ރިސޯޓުތަކުން ޑޮލަރު މާރުކުރަން ޖެހޭ ގޮތަށް ބޭރު ފައިސާގެ ބިލު މަޖިލީހުން ފާސްކޮށްފި

ރިސޯޓުތަކުން ޑޮލަރު މާރުކުރަން ޖެހޭ ގޮތަށް "ބޭރު ފައިސާގެ ބިލު" ރައްޔިތުންގެ މަޖިލީހުން މިއަދު  ފާސްކޮށްފި އެވެ.

ބިލު ފާސްކުރީ ވޯޓުގައި ބައިވެރިވި 67 މެންބަރުންގެ ތެރެއިން 56 މެންބަރުންގެ ތާއީދާ އެކުގައެވެ. 11 މެންބަރުން ވަނީ ބިލާ ދެކޮޅަށް ވޯޓު ދެއްވާފައެވެ.

ބިލުގައި ރާއްޖޭގެ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ އާމްދަނީގެ 20 ޕަސެންޓް މާރުކުރުމުގެ އިޚްތިޔާރު ދީފައިވެއެވެ. ގެސްޓުހައުސް، ސަފާރީ އަދި ހޮޓާތަކަށް ދީފައިވާ އިޚްތިޔާރަކީ މަހެއްގެ ތެރޭގައި އަންނަ ކޮންމެ ފަތުރުވެރިއަކަށް 25 ޑޮލަރުގެ ރޭޓުން ނުވަތަ މަހަކު ލިބޭ ބޭރު ފައިސާގެ އާމްދަނީން 20 ޕަސެންޓް މާރުކުރުމެވެ.

ފަތުރުވެރިކަމުގެ ޚިދުމަތް ދޭ ތަންތަނުގެ އިތުރުން، މާލީ އިދާރާތައް ފިޔަވައި އެހެން ފަރާތްތަކުން ވިއްކާ ނުވަތަ ފޯރުކޮށްދޭ ޚިދުމަތާއި މުދަލަކަށް ފާއިތުވި އަހަރުގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބޭ ފަރާތްތައް ވެސް މަހަކު ލިބޭ ބޭރު ފައިސާގެ އާމްދަނީއިން 20 ޕަސެންޓް މާރުކުރަން ޖެހޭނެއެވެ.

ކޮމިޓީން ބިލަށް ގެނެސްފައިވާ ބަދަލުތަކުގެ ތެރޭގައި ފަތުރުވެރިން ހިސާބުކުރުމުގައި 12 އަހަރު ފުރިހަމަނުވާ ކުދިން އިސްތިސްނާ ކުރުން ހިމެނެއެވެ. މި ބިލަކީ މިދިޔަ އޮކްޓޯބަރުގައި އަމަލުކުރަން ފެށި ރާއްޖޭގައި ބޭރު ފައިސާއިން މުއާމަލާތް ކުރުމުގެ އާ ގަވާއިދަށް ޤާނޫނީ ބާރު ދިނުމަށް އެކުލަވާލާފައިވާ ބިލެކެވެ.