އިސްލާމީ މަރުކަޒާއެކު އިތުރު މިސްކިތެއްގައި ތަރާވީހު ނަމާދު ކުރާނެ ދިވެހި ހާފިޒުން ހޯދަނީ

ކުރިއަށް އޮތް ރޯދަ މަހު، އިސްލާމީ މަރުކަޒާއެކު އިތުރު މިސްކިތެއްގައި އިމާމުވެ، ހިފްޒުކޮށް، ތަރާވީހު ނަމާދު ކުރާނެ ދިވެހި ހާފިޒުން ހޯދަން އިއުލާންކޮށްފި އެވެ.

އިސްލާމިކް މިނިސްޓްރީން ކުރި އިއުލާނުގައި ބުނީ ހާފިޒުން ހޯދަނީ މަސްޖިދުއްސުލްތާން މުޙައްމަދު ތަކުރުފާނުލް އައުޒަމް (އިސްލާމީ މަރުކަޒު) ގައްޔާއި މަސްޖިދު މަލިކި ސަލްމާން ގައި އިމާމުވެ، ހިފްޒުކޮށް ތަރާވީހު ނަމާދުކުރުމަށް ކަމަށެވެ.

ހަމައެކަނި ދިވެހި ހާފިޒުންނަށް ހުޅުވާލި މި ފުރުސަތުގައި އެ މަރުކަޒު ތަކުގައި ހިފްޒުކޮށް ތަރާވީހު ނަމާދު ކުރުމަށް އެދި ހުށަހަޅައި ފަރާތްތަކުގެ މެދުގައި ޓެސްޓެއް ބާއްވާނެ އެވެ.

އެ ޓެސްޓަށްފަހު، ހިފްޒު އެންމެ ރަނގަޅު ހަތަރު ފަރާތެއް ކަނޑައަޅާނެ އެވެ.

ޝައުގުވެރިވާ ފަރާތްތަކުން ފޯމު ފުރިހަމަކޮށް ލިޔުންތަކާ އެކު 2025 ވަނަ އަހަރުގެ ފެބުރުއަރީ 16 ވާ އާދިއްތަ ދުވަހުގެ 14:00 ގެ ކުރިން ހުށަހެޅުމަށް މިނިސްޓްރީން އެދެ އެވެ.

ހާފިޒުންނަށް އެލަވަންސް ފައިސާ ދެވޭނީ އިމާމުވެ، ހިފްޒުކޮށް، ތަރާވީހު ނަމާދު ކުރާ ކޮންމެ ރެޔަކަށް -/700 (ހަތްސަތޭކަ) ރުފިޔާގެ މަގުންނެވެ.

އެ ގޮތުން ގިނަވެގެން ފައިސާ ދެވޭނީ މިސްކިތަކަށް ދިވެހި ދެ ހާފިޒުންނަށެވެ.

މީލާދީ ކަލަންޑަރުގައިވާ ގޮތުން ނަމަ، އަންނަ އަހަރުގެ ރޯދަ މަސް ފެށޭނީ ފެބްރުއަރީ 28 ވަނަ ދުވަހު އެވެ.