މަނަދޫގައި ވައިން ހަކަތަ އުފައްދާ ނިޒާމުގެ ޕައިލެޓް ޕްރޮޖެކްޓެއް ފައްޓަނީ

ނ. މަނަދޫގައި ވައިން ހަކަތަ އުފައްދާ ނިޒާމުގެ ޕައިލެޓް ޕްރޮޖެކްޓެއް ފައްޓަން ސަރުކާރުން ނިންމައިފިއެވެ.

މި މަޝްރޫޢު ހިންގާނީ އޭޝިއަން ޑިވެލޮޕްމަންޓް ބޭންކް (އޭޑީބީ)ގެ އެހީގައި ހިންގަމުން އަންނަ އެޝުއާ ޕްރޮޖެކްޓުގެ ދަށުންނެވެ.

ފިނޭންސް މިނިސްޓްރީން މިދިޔަ ހޯމަ ދުވަހު ކުރި އިޢުލާނެއްގައި ބުނެފައިވަނީ މި މަޝްރޫޢުގެ މަސައްކަތް ކޮށްދޭނެ ފަރާތެއް ހޯދުމަށް ބީލަން ހުޅުވާލައިފައިވާ ކަމަށެވެ. މި ބީލަމުގައި ބައިވެރިވާން ރަޖިސްޓްރީ ކުރުމަށް 1500 ރުފިޔާ ނުވަތަ 100 ޑޮލަރުގެ ނޮން-ރިފަންޑަބަލް ފީއެއް ދައްކަންޖެހޭނެއެވެ.

ބީލަން ހުޅުވުން އޮންނާނީ އަންނަ އަހަރުގެ ފެބްރުއަރީ މަހުގެ 10 ވަނަ ދުވަހުގެ މެންދުރުފަހު 1:00 ގައި ފިނޭންސް މިނިސްޓްރީގެ ނެޝަނަލް ޓެންޑަރުގެ ޖަލްސާކުރާ މާލަމުގައެވެ. މި ޕްރޮޖެކްޓަކީ އާންމުކޮށް ހުޅުވާލެވިފައިވާ ބީލަމުގެ އުސޫލުގެ މަތިން، އަދި އޭޑީބީގެ "ސިންގަލް ސްޓޭޖް ޓޫ އެންވެލޮޕް" އުސޫލުން ބީލަންކުރުމަށް ހަމަޖެހިފައިވާ މަސައްކަތެކެވެ.

މީގެ ކުރިން ވެސް ރާއްޖޭގައި ވައިން ހަކަތަ އުފެއްދުމުގެ މަސައްކަތް ކޮށްފައިވެއެވެ. 2007 ވަނަ އަހަރު ސިންގަޕޫރުގެ ކުންފުންޏެއް ކަމަށްވާ ޑީއެލްއާރުއީ އިން ވަނީ ރާއްޖޭގެ ތިން ރަށެއްގައި ވައިން ހަކަތަ އުފައްދާ ނިޒާމެއް ގާއިމްކުރުމުގެ ޕައިލެޓް ޕްރޮޖެކްޓެއް ހިންގައިފައެވެ. ނަމަވެސް، މި މަޝްރޫޢުތައް ވަނީ ވަކި ހިސާބަކުން ހުއްޓިފައެވެ.

މިހާރުގެ ސަރުކާރުގެ އަމާޒަކީ 2028 ވަނަ އަހަރުގެ ކުރިން ރާއްޖޭގައި ބޭނުންކުރާ ހަކަތައިގެ 33 ޕަސެންޓަކީ އިޔާދަކުރަނިވި ހަކަތައަށް ހެދުމެވެ. މި އަމާޒާ އެއްގޮތަށް، މަނަދޫގައި ފަށަން ނިންމާފައިވާ ވައިން ހަކަތަ އުފައްދާ ނިޒާމުގެ ޕައިލެޓް ޕްރޮޖެކްޓަކީ މުހިންމު ފިޔަވަޅެއް ކަމުގައި ބެލެވެއެވެ.